بونیر پراسکیوشن ڈیپارٹمنٹ اور بونیر پریس کلب میں عوامی آگاہی کے فروغ کے لیے تعاون پر اتفاق
بونیر(بیورو چیف اے ار عابد بونیری) ڈسٹرکٹ پبلک پراسیکیوٹر امجد خان ایڈوکیٹ نے پبلک پراسیکیوٹر مزمل عالم اور اسسٹنٹ پبلک پراسیکیوٹر چنگیز خان کے ھمراہ ڈسٹرکٹ پریس کلب بونیر کا دورہ کیا، جہاں صدر ڈسٹرکٹ پریس کلب بونیر مختار خان نے سینئر صحافیوں کے ہمراہ مہمانوں کا خیرمقدم کیا۔
ملاقات کے دوران پراسیکیوشن ڈیپارٹمنٹ کے کردار، ذمہ داریوں اور عوامی آگاہی کے حوالے سے تفصیلی تبادلہ خیال کیا گیا۔ ڈسٹرکٹ پبلک پراسیکیوٹر امجد خان نے پراسیکیوشن کے قانونی کردار اور انصاف کی فراہمی کے عمل میں اس کی اہمیت پر روشنی ڈالتے ہوئے کہا کہ عوام میں محکمہ پراسیکیوشن کی خدمات اور ذمہ داریوں سے متعلق آگاہی پیدا کرنے کے لیے میڈیا کے ساتھ قریبی رابطہ اور تعاون ضروری ہے۔
انہوں نے کہا کہ ڈسٹرکٹ پریس کلب بونیر کے ساتھ پہلے سے موجود رابطوں کو مزید مضبوط بنایا جائے گا اور عوامی آگاہی کے لیے میڈیا کے ساتھ تعاون جاری رکھا جائے گا، تاکہ شہریوں کو قانونی امور اور پراسیکیوشن ڈیپارٹمنٹ کی خدمات سے متعلق درست معلومات فراہم کی جا سکیں۔
صدر ڈسٹرکٹ پریس کلب بونیر مختار خان نے کہا کہ قانون کی عملداری، انصاف کی فراہمی اور شہریوں کے قانونی حقوق کے تحفظ میں پراسکیوشن کا کردار انتہائی اہم ہے جبکہ میڈیا عوام کو قانونی امور اور اداروں کی ذمہ داریوں سے آگاہ کرنے میں مؤثر کردار ادا کرتا ہے۔ انہوں نے پراسیکیوشن ڈیپارٹمنٹ کے ساتھ مثبت اور پیشہ ورانہ تعاون جاری رکھنے کے عزم کا اظہار کیا۔
ملاقات میں پریس کلب کے سینئر صحافی سید الرشید، عبدالرحمن عابد، نصیب یار، عمران اللہ۔ خالد خان اور اصف خان بھی موجود تھے۔