ثمر باغ میں عوام کو ریلیف دینے کا مشن، زائد کرایہ وصول کرنے والوں کے خلاف اسسٹنٹ کمشنر کا گرینڈ آپریشن
ثمر باغ (بیورو رپورٹ) حکومت کی جانب سے پیٹرولیم مصنوعات کی قیمتوں میں لگاتار کمی کے باوجود مسافر بردار گاڑیوں کی جانب سے زائد کرایہ وصول کرنے کی شکایات پر ضلعی انتظامیہ حرکت میں آ گئی۔ اسسٹنٹ کمشنر ثمر باغ محمد ایاز نے مختلف روٹس، اڈوں اور مرکزی شاہراہوں کا تفصیلی معائنہ کیا اور عوام کو ریلیف فراہم کرنے کے لیے ایک بھرپور اور مؤثر آگاہی مہم کا آغاز کر دیا۔
معائنے کے دوران اسسٹنٹ کمشنر نے مسافروں اور ٹرانسپورٹ ڈرائیورز سے براہِ راست ملاقات کی، ان کے مسائل سنے اور انہیں پیٹرولیم قیمتوں میں کمی کے بعد کرایوں میں کمی کے حوالے سے تفصیلی طور پر آگاہ کیا۔ ان کا کہنا تھا کہ جب پیٹرول اور ڈیزل سستا ہو گیا ہے تو کرایہ مہنگا رہنے کا کوئی جواز نہیں بنتا۔ عوام کا حق ہے کہ انہیں تیل کی قیمتوں میں کمی کا براہِ راست فائدہ پہنچے۔
اس موقع پر ڈرائیورز اور ٹرانسپورٹ مالکان کو سختی سے ہدایت کی گئی کہ وہ مسافروں سے تیل میں کمی کے مطابق ہی کرایہ وصول کریں۔ زائد کرایہ وصول کرنا کسی صورت برداشت نہیں کیا جائے گا۔ جو بھی ٹرانسپورٹر مقررہ کرائے سے زیادہ وصول کرتا ہوا پایا گیا، اس کے خلاف سخت قانونی کارروائی عمل میں لائی جائے گی۔
اسسٹنٹ کمشنر محمد ایاز نے اس عزم کا اعادہ کرتے ہوئے واضح کیا کہ مقامی ٹرانسپورٹ کے لیے نیا اور نظرِ ثانی شدہ کرایہ نامہ جلد از جلد جاری کر دیا جائے گا، جس پر عملدرآمد ہر صورت یقینی بنایا جائے گا۔ یہ کرایہ نامہ ہر اڈے اور ہر گاڑی میں نمایاں جگہ پر آویزاں ہوگا تاکہ کوئی بھی ڈرائیور مسافروں کو گمراہ نہ کر سکے اور ہر مسافر اپنے حق سے باخبر ہو۔
ضلعی انتظامیہ عوام کو ریلیف فراہم کرنے اور ناجائز منافع خوری یا زائد کرایہ وصولی کی روک تھام کے لیے پوری طرح پرعزم ہے۔ انتظامیہ کا پیغام واضح ہے کہ عوام کی جیب پر ڈاکہ ڈالنے کی اجازت کسی کو نہیں دی جائے گی۔
آخر میں شہریوں سے بھی پُرخلوص اپیل کی گئی کہ وہ زائد کرایہ وصول کرنے والوں کی نشاندہی کر کے انتظامیہ کو رپورٹ کریں تاکہ ان کے خلاف بروقت اور سخت قانونی کارروائی عمل میں لائی جا سکے۔ کیونکہ عوام کا تعاون ہی اس مہم کی اصل کامیابی ہے۔