اسلام آباد: سوشل میڈیا پر ججز کو بدنام کرنے والوں کے خلاف سخت کارروائی کا فیصلہ کیا گیا ہے، جس کے تحت پی ٹی اے کو نفرت انگیز مواد پھیلانے والوں کی معلومات اکٹھی کرنے کا حکم دے دیا گیا ہے۔
عدلیہ مخالف نفرت انگیز مواد روکنے کے لیے قائم جے آئی ٹی کا اجلاس ایف آئی اے ہیڈ کوارٹر اسلام آباد میں ہوا۔
جے آئی ٹی کی سربراہی ایف آئی اے کے ایڈیشنل ڈائریکٹر جنرل نے کی جس میں سوشل میڈیا پر عدلیہ کو بدنام کرنے والوں کے خلاف سخت کارروائی کا فیصلہ کیا گیا۔
حساس اداروں کے حکام نے ایکشن پلان جے آئی ٹی سربراہ کو پیش کر دیا۔
جے آئی ٹی نے پی ٹی اے کو ہدایت کی کہ وہ نفرت انگیز مواد پھیلانے والوں کے بارے میں معلومات اکٹھی کرے اور ساتھ ہی مواد کو اپ لوڈ کرنے، شیئر کرنے اور تبصرہ کرنے والوں کے بارے میں تمام تفصیلات حاصل کرے۔
ذرائع کے مطابق اگلے مرحلے میں عدلیہ مخالف مواد پھیلانے والوں کی گرفتاری بھی متوقع ہے۔