سوات میں بیوی کے قتل کا جرم ثابت، شوہر کو سزائے موت سنا دی گئی

سوات (بیورو رپورٹ) ایڈیشنل سیشن جج سوات ناصر خان کی عدالت نے بیوی کو سڑک کنارے فائرنگ کرکے قتل کرنے کے مقدمے میں جرم ثابت ہونے پر شوہر اختر علی ولد عمر علی کو سزائے موت سنا دی۔ ملزم نے 5 ستمبر 2023ء کو مینگورہ کے تھانہ بنڑ کی حدود میں محلہ بنڑ میں اپنی اہلیہ مسماۃ نائلہ کو اس وقت فائرنگ کرکے قتل کردیا تھا جب وہ اپنے چھوٹے بچے کے ہمراہ علاج کے لیے ہسپتال جا رہی تھی۔ واقعے کے بعد مقتولہ کی لاش کے قریب بیٹھے بچے کی روتے ہوئے تصویر سوشل میڈیا پر وائرل ہوئی تھی، جس نے عوام کو غمگین کردیا تھا۔ دلائل مکمل ہونے کے بعد عدالت نے ملزم کو مجرم قرار دیتے ہوئے سزائے موت کا حکم سنا دیا۔