اسلام آباد: اسلام آباد چیمبر آف کامرس اینڈ انڈسٹری (آئی سی سی آئی) نے چائنہ کونسل فار دی پروموشن آف انٹرنیشنل ٹریڈ (سی سی پی آئی ٹی)، لیاؤننگ سب کونسل کے ساتھ ایک تاریخی شراکت داری قائم کی ہے، جس کے تحت دو طرفہ اقتصادیات کو بڑھانے کے لیے ایک مفاہمت کی یادداشت (ایم او یو) پر دستخط کیے ہیں۔ اس اسٹریٹجک اقدام سے دونوں ممالک میں کاروبار کے نئے مواقع پیدا ہوں گے اور باہمی ترقی اور خوشحالی کو فروغ ملے گا۔یاد رہے کہ
چین کا صنعتی صوبہ لیاوننگ 370 بلین ڈالر کی جی ڈی پی کے ساتھ دنیا کا تیسرا سب سے بڑا صنعتی حب ہے۔
اس موقع پر آئی سی سی آئی کے صدر ناصر منصور قریشی نے پاکستان کی مینوفیکچرنگ صلاحیتوں اور برآمدات کو بڑھانے میں ٹیکنالوجی کی منتقلی کے اہم کردار پر زور دیا۔ پاکستان کے قیمتی جواہرات اور پتھروں کے وسیع ذخائر پر روشنی ڈالتے ہوئے انہوں نے آٹوموبائل، ایوی ایشن، فارماسیوٹیکل اور کان کنی جیسے شعبوں میں مشترکہ منصوبوں کی اہمیت پر زور دیا۔صدر قریشی کے مطابق، غیر ملکی زرمبادلہ کمانے کی پاکستان کی فوری ضرورت کو حل کرنے کا انحصار بین الاقوامی سطح پر مسابقتی مینوفیکچرنگ پر ہے۔ انہوں نے تجویز پیش کی کہ چین پاکستان کو ادویات کی تیاری اور عالمی منڈیوں میں برآمد کرنے کے لیے ایک اسٹریٹجک بنیاد کے طور پر استعمال کر سکتا ہے، بشرطیکہ مقامی طور پر جدید مینوفیکچرنگ یونٹس قائم کیے جائیں، جس سے دونوں ممالک کے باہمی فائدے کو یقینی بنایا جائے۔سی سی پی آئی ٹی کے چیف نمائندے Chengzhi Ma نے مقامی سرمایہ کاروں کو ضروری ٹیکنالوجیز کی منتقلی کے لیے تعاون کا یقین دلایا۔ انہوں نے اسلام آباد میں جیمز اینڈ جیولز ڈسپلے سینٹر کی تکمیل کا بھی اعلان کیا جو کہ ویلیو ایڈڈ مصنوعات کی برآمد اور مقامی کاروباریوں اور کارکنوں کو تربیت فراہم کرنے کے لیے ایک مرکز کے طور پر کام کرے گا۔
ورچوئل سیشن میں حسیب الرحمان نے بہتر رابطے کی اہمیت کو اجاگر کیا۔
چینی وفد میں اقتصادی اور تجارتی نمائندے Pu Qian اور سی پی ای سی سرمایہ کاری کے ماہر اور بینکر اینڈی لیو جیسی شخصیات شامل تھیں۔ آئی سی سی آئی کی جانب سے سینئر نائب صدر عبدالرحمٰن صدیقی، نائب صدر ناصر محمود چوہدری اور ایگزیکٹو ممبران ملک محسن خالد، اسحاق سیال، عرفان چوہدری، عمر خیام اور ذوالقرنین عباسی نے تقریب میں شرکت کی۔ معزز شرکاء میں ICCI کے سابق ایس وی پی توصیف زمان، اور زریما انوسٹمنٹ ایل ایل سی، کرغزستان کے چوہدری جاوید صابر بھی شامل تھے۔