ایشمل قتل کیس، بحرین بار کے وکلاء کی متاثرہ خاندان اور کمیٹی سے ملاقات

سوات (بیورورپورٹ) ایشمل قتل کیس کے سلسلے میں بحرین بار کے وکلاء نے مدین میں مقتولہ ایشمل کے خاندان اور کیس کے لیے قائم کمیٹی کے ارکان سے خصوصی ملاقات کی اور کیس کے حوالے سے تفصیلی مشاورت کی۔ وکلاء نے ایشمل کے بہیمانہ قتل کی شدید مذمت کرتے ہوئے کہا کہ بحرین بار کے تمام وکلاء روز اول سے اس کیس میں اپنا کردار ادا کر رہے ہیں اور متاثرہ خاندان کو ہر ممکن قانونی معاونت فراہم کی جائے گی۔ انہوں نے کہا کہ یہ مقدمہ اب صرف ایشمل کے خاندان کا نہیں بلکہ پورے سوات کے عوام کا بن چکا ہے، جبکہ خواتین کا سڑکوں پر نکل کر احتجاج کرنا اس واقعے پر عوامی تشویش کی عکاسی کرتا ہے۔ وکلاء نے واضح کیا کہ خاندان کی جانب سے مقرر کردہ وکیل شبیر احمد خان ایڈووکیٹ کے ساتھ مل کر قانونی جدوجہد جاری رکھی جائے گی اور ملزم کو قانون کے مطابق کیفر کردار تک پہنچانے کے لیے ہر ممکن کردار ادا کیا جائے گا۔ انہوں نے کیس کے حوالے سے پھیلائی جانے والی افواہوں کی بھی تردید کی۔ ایشمل کے خاندان اور کمیٹی ارکان نے بحرین بار کے وکلاء کا مدین آکر قانونی رہنمائی اور مشاورت فراہم کرنے پر شکریہ ادا کیا۔
۔۔۔۔