ڈویژنل ہیڈ کوارٹر ضلع سوات سمیت ضلع بر سوات میں انسدادِ پولیو مہم کے دوسرے روز کی کارکردگی کا جائزہ، کم کوریج والے علاقوں پر خصوصی توجہ دینے کی ہدایت
سوات(بیورورپورٹ) ڈپٹی کمشنر سوات سلیم جان مروت کی زیرِ صدارت انسدادِ پولیو مہم کے دوسرے روز کی کارکردگی کا جائزہ اجلاس منعقد ہوا۔ اجلاس میں ضلع سوات اور ضلع بر سوات میں مہم کی پیش رفت، مقررہ اہداف کے مقابلے میں حاصل شدہ کوریج، پولیو ٹیموں کی کارکردگی اور سکیورٹی انتظامات کا تفصیلی جائزہ لیا گیا۔اجلاس میں ڈسٹرکٹ پولیس آفیسر سوات محمد عمر، ڈسٹرکٹ پولیس آفیسر بر سوات، ایڈیشنل ڈپٹی کمشنر (جنرل) بر سوات اور دونوں اضلاع کے تمام اسسٹنٹ کمشنرز نے ویڈیو لنک کے ذریعے شرکت کی۔ ایڈیشنل ڈپٹی کمشنر (ریلیف و ہیومن رائٹس) سوات، ایڈیشنل اسسٹنٹ کمشنر بابوزئی، ڈسٹرکٹ ہیلتھ آفیسر سوات، این اسٹاپ آفیسر سوات، محکمہ تعلیم اور دیگر متعلقہ محکموں کے نمائندے بھی اجلاس میں شریک ہوئے۔این اسٹاپ آفیسر ڈاکٹر انور جمال نے دونوں اضلاع میں مہم کے دوسرے روز کی پیش رفت پر جامع بریفنگ دی۔ بریفنگ میں پولیو اور سکیورٹی ٹیموں کی تعیناتی، گھر گھر رسائی، بچوں کو قطرے پلانے کی شرح، مائیکرو پلان اور مجموعی اہداف کے مقابلے میں حاصل شدہ کوریج پیش کی گئی۔ قطرے پلانے سے انکار کرنے والے والدین کو قائل کرنے اور ان کے بچوں کو قطرے پلانے میں پیش رفت، رہ جانے والے بچوں تک دوبارہ رسائی اور دوسرے روز سامنے آنے والے مسائل و رکاوٹوں کا بھی تفصیلی جائزہ لیا گیا۔ڈپٹی کمشنر سوات سلیم جان مروت نے ہدایت کی کہ کم کوریج والے علاقوں کو ترجیح دی جائے اور وہاں نگرانی، ٹیموں کی معاونت اور دوبارہ دوروں کا عمل مزید مؤثر بنایا جائے، تاکہ مقررہ اہداف بروقت حاصل کیے جا سکیں۔ انہوں نے واضح کیا کہ مائیکرو پلان کے مطابق پانچ سال سے کم عمر ہر بچے تک رسائی یقینی بنائی جائے اور مہم کے پہلے دو روز میں کسی بھی وجہ سے قطرے پینے سے رہ جانے والے بچوں کا درست ریکارڈ مرتب کرکے انہیں دوبارہ دوروں کے ذریعے قطرے پلائے جائیں۔انہوں نے دور افتادہ اور دشوار گزار علاقوں پر خصوصی توجہ دینے، فیلڈ ٹیموں کو درپیش مشکلات فوری حل کرنے اور انکاری والدین کو آگاہی و مؤثر رابطے کے ذریعے قائل کرنے کی ہدایت کی۔ متعلقہ اسسٹنٹ کمشنرز اور محکمہ صحت کے افسران کو فیلڈ نگرانی مضبوط بنانے، ٹیموں کی حاضری اور کارکردگی کی باقاعدہ جانچ اور روزانہ کی پیش رفت کی درست و بروقت رپورٹنگ یقینی بنانے کی بھی ہدایت کی گئی۔ ڈیوٹی میں غفلت برتنے والے اہلکاروں کے خلاف قواعد کے مطابق محکمانہ کارروائی کی ہدایات بھی جاری کی گئیں۔ڈپٹی کمشنر سوات نے پولیس، محکمہ صحت اور دیگر متعلقہ اداروں کو قریبی رابطہ برقرار رکھنے کی ہدایت کی، تاکہ پولیو ٹیموں کو مناسب سکیورٹی اور ضروری معاونت میسر رہے، مہم کی سرگرمیاں مؤثر انداز میں جاری رہیں اور کوئی اہل بچہ پولیو سے بچاؤ کے قطروں سے محروم نہ رہے۔
۔۔۔۔۔۔۔۔۔۔۔۔۔۔۔۔۔۔
