پولیو مہم کے پہلے روز ایوننگ پروگریس ریویو اجلاس، ڈپٹی کمشنر دیر پائین کی فیلڈ کارکردگی مزید مؤثر بنانے کی ہدایات
ضلعی انتظامیہ دیر پائین
21 ستمبر 2026
. صوبائی حکومت کے احکامات کی روشنی میں جاری خصوصی انسدادِ پولیو مہم کے پہلے روز ڈپٹی کمشنر دیر پائین جناب محمد بشارت احمد کی زیرِ صدارت ایوننگ پروگریس ریویو اجلاس منعقد ہوا، جس میں پہلے روز کی فیلڈ سرگرمیوں، مقررہ اہداف، یونین کونسل کی سطح پر کوریج اور فیلڈ میں درپیش مسائل کا تفصیلی جائزہ لیا گیا۔
اجلاس میں این اسٹاپ آفیسر نے انسدادِ پولیو مہم کے پہلے روز مقررہ اہداف، فیلڈ سرگرمیوں، حاصل شدہ کارکردگی اور فیلڈ میں پیش آنے والے مسائل کے حوالے سے تفصیلی بریفنگ دی۔ انتظامی افسران، ایریا انچارجز اور ضلعی محکمہ صحت کے افسران نے بھی اپنے متعلقہ علاقوں میں مہم کی نگرانی، کوریج اور درپیش فیلڈ مسائل سے اجلاس کو آگاہ کیا۔
ڈپٹی کمشنر محمد بشارت احمد نے مہم کے پہلے روز کے مجموعی اہداف، تمام یونین کونسلز میں بچوں کی کوریج اور فیلڈ ٹیموں کی کارکردگی کا تفصیلی جائزہ لیتے ہوئے متعلقہ افسران کو ہدایات جاری کیں کہ مقررہ اہداف کے حصول اور ہر بچے تک پولیو سے بچاؤ کے قطرے پہنچانے میں کسی قسم کی کوتاہی برداشت نہیں کی جائے گی۔
ڈپٹی کمشنر نے واضح ہدایت کی کہ جن علاقوں میں پولیو مہم کی کارکردگی مقررہ معیار کے مطابق تسلی بخش نہیں ہوگی، ان علاقوں کے یونین کونسل میڈیکل آفیسرز اور ایریا انچارجز کو آئندہ جائزہ اجلاس میں متعلقہ ٹیم کے ہمراہ پیش ہو کر کم کارکردگی کی وجوہات اور درپیش مسائل کے حوالے سے وضاحت پیش کرنا ہوگی۔
انہوں نے تمام پولیو فیلڈ ٹیموں کو ہدایت کی کہ مہم کے دوران مقررہ طریقہ کار اور حفاظتی ضوابط پر مکمل عمل درآمد یقینی بنایا جائے، جبکہ روزانہ کی بنیاد پر مقررہ اہداف مکمل کرتے ہوئے کسی بھی بچے کے رہ جانے کی صورت میں فوری طور پر اس کی کوریج یقینی بنائی جائے۔
ڈپٹی کمشنر نے مہم کے دوران غیر حاضری یا ڈیوٹی میں غفلت کا مظاہرہ کرنے والے اہلکاروں کے خلاف قواعد و ضوابط کے مطابق کارروائی کی ہدایت بھی جاری کی، جبکہ مقررہ اہداف مکمل نہ کرنے والے ذمہ داران کے خلاف بھی کارروائی عمل میں لانے کی ہدایت کی۔
انہوں نے ہدایت کی کہ ہسپتالوں کے مرکزی دروازوں اور داخلی راستوں پر خصوصی پولیو ڈیسک قائم کرکے پولیو ٹیموں کی ڈیوٹیاں یقینی بنائی جائیں، تاکہ ہسپتال آنے والے پانچ سال سے کم عمر بچوں کو پولیو سے بچاؤ کے قطرے پلائے جا سکیں۔
ڈپٹی کمشنر نے پولیس اور دیر لیویز اہلکاروں کو بھی ہدایت کی کہ ٹرانزٹ پوائنٹس پر تعینات پولیو ٹیموں کے ساتھ بھرپور تعاون کیا جائے اور عوامی نقل و حمل کی گاڑیوں کو مناسب انداز میں روک کر ان میں موجود پانچ سال سے کم عمر بچوں کو پولیو سے بچاؤ کے قطرے پلانے کا عمل یقینی بنایا جائے۔
ڈپٹی کمشنر نے اس عزم کا اظہار کیا کہ انسدادِ پولیو مہم کے مقررہ اہداف کے حصول، مؤثر نگرانی اور ہر بچے تک رسائی کے لیے ضلعی انتظامیہ، محکمہ صحت، پولیس، دیر لیویز اور پولیو ٹیموں کے درمیان مربوط تعاون کو مزید مؤثر بنایا جائے گا۔
