سوات کے خصوصی طلبہ نے انٹرمیڈیٹ امتحان میں تاریخ رقم کردی، ہیومینٹیز گروپ کی پہلی تینوں پوزیشنیں اپنے نام

سوات(سیدشہاب الدین ) سوات کے انسٹیٹیوٹ آف چلڈرن ہیئرنگ اسپیچ امپیئرمنٹس کے قوتِ سماعت و گویائی سے محروم خصوصی طلبہ نے سوات تعلیمی بورڈ کے زیر اہتمام انٹرمیڈیٹ کے سالانہ امتحان میں پہلی مرتبہ شرکت کرتے ہوئے شاندار کامیابی حاصل کرلی اور ہیومینٹیز گروپ کی پہلی تینوں پوزیشنیں اپنے نام کرلیں۔ ادارے کے طالب علم محمد سیام نے 1107 نمبر حاصل کرکے پہلی پوزیشن حاصل کی، جبکہ معاذ خان اور محمد عباس نے 1083، 1083 نمبر حاصل کرکے مشترکہ طور پر دوسری، اسی ادارے کی طالبہ عریبہ اور طالب علم شاہ خالد نے 1082، 1082 نمبر حاصل کرکے مشترکہ طور پر تیسری پوزیشن حاصل کی۔ نمایاں پوزیشن حاصل کرنے والے طلبہ کو سوات تعلیمی بورڈ کی جانب سے شیلڈز بھی دی گئیں۔ کامیاب طلبہ نے اپنی کامیابی پر خوشی کا اظہار کرتے ہوئے کہا کہ یہ ان کی محنت، والدین کی دعاؤں اور اساتذہ کی رہنمائی کا نتیجہ ہے، وہ مستقبل میں بھی مزید تعلیم حاصل کرکے ملک و قوم کا نام روشن کرنا چاہتے ہیں۔ اساتذہ نے کہا کہ خصوصی بچوں کی یہ کامیابی ان کی مسلسل محنت اور ادارے کی جانب سے فراہم کردہ بہتر تعلیمی ماحول کا ثمر ہے، بچوں نے ثابت کردیا کہ مناسب مواقع اور حوصلہ افزائی ملے تو وہ کسی سے پیچھے نہیں۔ انسٹیٹیوٹ کے ڈپٹی ڈائریکٹر ڈاکٹر شریف اللہ نے کہا کہ خصوصی بچوں نے پہلی مرتبہ انٹرمیڈیٹ امتحان میں نمایاں پوزیشنیں حاصل کرکے اپنی صلاحیت ثابت کردی ہے جبکہ پارٹ ون میں بھی ان کی کارکردگی شاندار رہی، ادارے میں ڈھائی سو سے زائد خصوصی بچے زیر تعلیم ہیں جنہیں ماہر اساتذہ کی نگرانی میں ان کی ضروریات کے مطابق خصوصی اور جدید طریقہ تدریس کے ذریعے تعلیم دی جارہی ہے۔

۔۔۔۔