سوات: شموزو میں سیلابی خطرات سے بچاؤ کے لیے 10 کروڑ روپے کا حفاظتی منصوبہ جاری

سوات (بیورورپورٹ) صوبائی وزیر ہاؤسنگ خیبرپختونخوا ڈاکٹر امجد علی کے فنڈز سے شموزو میں دریائے سوات کے کٹاؤ سے زرعی زمینوں، باغات، فصلوں اور آبادی کے تحفظ کے لیے 10 کروڑ روپے کی لاگت سے حفاظتی پُشتوں کی تعمیر کا کام جاری ہے۔ جدید تقاضوں اور عوامی ضروریات کو مدنظر رکھتے ہوئے تعمیر کی جانے والی حفاظتی پُشتیں نہ صرف دریائے سوات کے کٹاؤ اور ممکنہ سیلابی خطرات سے قیمتی زرعی اراضی اور آبادی کو تحفظ فراہم کریں گی بلکہ مستقبل میں عوام کے لیے واکنگ ٹریک کے طور پر بھی استعمال کی جا سکیں گی۔ منصوبے کی تکمیل سے کسانوں اور زمینداروں کی زمینوں، باغات اور فصلوں کو تحفظ ملنے کے ساتھ علاقے کے عوام کو محفوظ اور بہتر ماحول بھی میسر آئے گا، جبکہ مقامی معیشت اور زراعت کے تحفظ میں بھی مدد ملے گی۔ مقامی عمائدین، زمینداروں اور کسانوں نے منصوبے پر خوشی کا اظہار کرتے ہوئے صوبائی وزیر ہاؤسنگ ڈاکٹر امجد علی کا شکریہ ادا کیا اور اسے علاقے کی دیرینہ ضرورت قرار دیا۔
۔۔۔۔۔