سوات: سیدوشریف میں زمین کے تنازع پر فائرنگ، باپ بیٹے اور خاتون سمیت 3 افراد جاں بحق، اسپتال میں بھی فریقین گھتم گھتا

سوات (بیورو رپورٹ)سیدوشریف کے علاقے میاں بابا میں زمین کے تنازع پر دو فریقین کے درمیان فائرنگ کے نتیجے میں باپ بیٹے اور خاتون سمیت 3 افراد جاں بحق ہوگئے۔ پولیس کے مطابق ایک فریق سے اسماعیل ولد محمد شاہ اور اس کا بیٹا احتشام ساکنان سیدوشریف جبکہ مخالف فریق سے مسماۃ (ب) زوجہ خادی رحمان سکنہ بٹوڑہ جاں بحق ہوئے۔ واقعے کے بعد پولیس نے لاشوں کو اپنی تحویل میں لے کر پوسٹ مارٹم کے لیے سیدوشریف ہسپتال منتقل کیا۔ پولیس کے مطابق لاشیں ہسپتال پہنچنے کے بعد وہاں بھی دونوں فریقین کے افراد کے درمیان بدمزگی ہوئی اور بات تصادم تک پہنچ گئی، تاہم پولیس نے فوری طور پر موقع پر پہنچ کر بیچ بچاؤ کیا اور فریقین کو منتشر کرکے صورتحال پر قابو پالیا۔ پولیس نے واقعے کے مختلف پہلوؤں سے تفتیش شروع کردی ہے جبکہ مزید قانونی کارروائی جاری ہے۔
۔۔۔