پاکستان

سوات میں صحت کی سہولیات کی بہتری، 37 صحت مراکز کی سولرائزیشن مکمل

نومبر 20, 2026 • Press Release

سوات میں صحت کی سہولیات کی بہتری، 37 صحت مراکز کی سولرائزیشن مکمل، ڈپٹی کمشنر عدنان ابرار کی زیرِ صدارت ڈسٹرکٹ سٹئرنگ کمیٹی کا ماہانہ جائزہ اجلاس

سوات(بیورورپورٹ)ڈپٹی کمشنر سوات عدنان ابرار کی زیرِ صدارت گڈ گورننس کے تحت ڈسٹرکٹ سٹئرنگ کمیٹی (محکمہ صحت) کا اکتوبر 2026 کی کارکردگی سے متعلق ماہانہ جائزہ اجلاس منعقد ہواجس میں ضلع بھر کے سرکاری ہسپتالوں اور بنیادی صحت مراکز کی کارکردگی، طبی سہولیات کی دستیابی اور گزشتہ اجلاس میں دی گئی ہدایات پر عمل درآمد کا تفصیلی جائزہ لیا گیا۔اجلاس میں ڈسٹرکٹ مانیٹرنگ آفیسر ہیلتھ نے ماہ اکتوبر کی کارکردگی اور گزشتہ فیصلوں پر عمل درآمد کے حوالے سے تفصیلی بریفنگ دی۔ بتایا گیا کہ ڈپٹی کمشنر سوات کی سابقہ ہدایات کے مطابق 37 بنیادی مراکز صحت، دیہی مراکز صحت، سول ڈسپنسریوں اور دیگر صحت مراکز کی سولرائزیشن مکمل کر لی گئی ہے جس سے ان اداروں میں بجلی کی فراہمی اور طبی خدمات کے تسلسل میں بہتری کی توقع ہے۔اجلاس کو آگاہ کیا گیا کہ غیر حاضر عملے کے خلاف کارروائی کرتے ہوئے تنخواہوں سے کٹوتیاں اور ملازمت سے برطرفی سمیت ضروری اقدامات کیے گئے ہیں۔ اسی طرح سی ٹی سکین آپریٹر کی خالی آسامی پُر کر دی گئی ہے جبکہ جنرل ڈیوٹی پر تعینات ایسے اہلکاروں کو بھی ان کی اصل جائے تعیناتی پر واپس بھیجا گیا ہے جو اپنی متعلقہ پوسٹوں پر خدمات انجام نہیں دے رہے تھے۔ڈپٹی کمشنر سوات نے تمام صحت مراکز میں ضروری ادویات کی دستیابی بہتر بنانے، عملے کی باقاعدہ حاضری یقینی بنانے اور مریضوں کو بروقت طبی سہولیات فراہم کرنے کی ہدایت کی۔ انہوں نے کہا کہ سرکاری ہسپتالوں کی کارکردگی میں بہتری کا حقیقی فائدہ تب ہوگا جب عام شہری کو علاج، ادویات اور ضروری طبی سہولیات کے حصول میں مشکلات کا سامنا نہ کرنا پڑے۔اجلاس میں میاں گل عبدالحق جہانزیب کڈنی ہسپتال کی کارکردگی، دستیاب سہولیات اور متعلقہ امور کا بھی تفصیلی جائزہ لیا گیا۔اجلاس میں ایڈیشنل ڈپٹی کمشنر (فنانس اینڈ پلاننگ) سوات سید نعمان علی شاہ، ڈسٹرکٹ ہیلتھ آفیسر سوات، میڈیکل سپرنٹنڈنٹ میاں گل عبدالحق جہانزیب کڈنی ہسپتال، ڈپٹی میڈیکل سپرنٹنڈنٹ سیدو گروپ آف ٹیچنگ ہسپتال، ڈسٹرکٹ مانیٹرنگ آفیسر ہیلتھ، ڈسٹرکٹ پاپولیشن آفیسر، ڈرگ انسپکٹر اور محکمہ صحت کے دیگر نمائندوں نے شرکت کی۔
۔۔۔۔۔۔۔۔۔۔۔۔۔۔۔۔۔۔۔۔