پاکستان

ڈسٹرکٹ اسٹیئرنگ کمیٹی (صحت) کا اجلاس

نومبر 20, 2026 • Press Release

آج مورخہ 20 نومبر 2026 کو ڈسٹرکٹ اسٹیئرنگ کمیٹی (صحت) کا ایک اہم اجلاس ڈسٹرکٹ جرگہ ہال دیر لوئر میں *ایڈیشنل ڈپٹی کمشنر (جنرل) دیر لوئر، ڈاکٹر عزا ارشد* کی زیرِ صدارت منعقد ہوا۔ اجلاس میں ڈسٹرکٹ ہیلتھ آفیسر (DHO) اور محکمہ صحت کے دیگر متعلقہ افسران نے شرکت کی۔
اجلاس کے دوران ڈی ایم او ہیلتھ دیر لوئر نے فورم کو محکمہ صحت کی مجموعی کارکردگی، گزشتہ اجلاس کے فیصلوں پر عمل درآمد اور مختلف صحت مراکز کی صورتحال کے حوالے سے تفصیلی بریفنگ دی۔
اجلاس میں گزشتہ اجلاس کے فیصلوں پر عمل درآمد کا جائزہ لیا گیا، جبکہ سرکاری ہسپتالوں اور صحت مراکز میں ادویات کی دستیابی کے مسئلے کو متعلقہ اعلیٰ حکام کے ساتھ مؤثر انداز میں اٹھانے کی ہدایت کی گئی۔ مزید برآں، طبی و غیر طبی عملے کی حاضری کو یقینی بنانے، ڈسٹرکٹ ہیڈ کوارٹر (DHQ) ہسپتال کے ڈیوٹی روسٹر کو مؤثر اور باقاعدہ بنانے اور طویل عرصے سے غیر حاضر ملازمین کے خلاف قواعد و ضوابط کے مطابق کارروائی عمل میں لانے پر زور دیا گیا۔
ایڈیشنل ڈپٹی کمشنر نے متعلقہ ٹی ایم اوز کو ہدایت کی کہ تمام تحصیل ہیڈ کوارٹر (THQ) اور ڈسٹرکٹ ہیڈ کوارٹر (DHQ) ہسپتالوں میں صفائی ستھرائی کے نظام کو بہتر بنانے کے لیے مناسب مقامات پر کوڑا کرکٹ جمع کرنے کے ڈسٹ بن نصب کیے جائیں۔ انہوں نے مزید واضح کیا کہ طویل غیر حاضری کے مرتکب ملازمین کے خلاف تنخواہوں سے قواعد کے مطابق کٹوتی کو یقینی بنایا جائے اور اس ضمن میں کسی قسم کی غفلت یا کوتاہی برداشت نہ کی جائے۔
اجلاس کے اختتام پر ایڈیشنل ڈپٹی کمشنر نے اس امر پر زور دیا کہ محکمہ صحت کے تمام متعلقہ افسران عوام کو معیاری طبی سہولیات کی فراہمی، عملے کی حاضری، ادویات کی دستیابی اور ہسپتالوں میں صفائی ستھرائی کو یقینی بنانے کے لیے اپنی ذمہ داریاں مؤثر اور مستعدی سے ادا کریں۔