علامہ اقبال اوپن یونیورسٹی کے خزاں سمسٹر داخلوں کی آخری تاریخ میں توسیع

ثمرباغ (نمائندہ نوائے دیر) علامہ اقبال اوپن یونیورسٹی ریجنل کیمپس تیمرگرہ کے ریجنل ڈائریکٹر سلطان روم نے طلبہ و طالبات کو آگاہ کیا ہے کہ یونیورسٹی کے سمسٹر خزاں 2026ء کے اوپن ڈسٹنس لرننگ (ODL) پروگرامز میں داخلوں کی آخری تاریخ 5 اکتوبر 2026ء تک بڑھا دی گئی ہے۔
ریجنل ڈائریکٹر سلطان روم نے کہا ہے کہ حال ہی میں ایف اے اور ایف ایس سی کا رزلٹ جاری ہوچکا ہے، اس لیے ایسے طلبہ و طالبات جو کسی کالج یا یونیورسٹی میں باقاعدہ (ریگولر) داخلہ نہیں لینا چاہتے، وہ علامہ اقبال اوپن یونیورسٹی کے ذریعے اپنی تعلیمی سلسلہ آگے بڑھا سکتے ہیں۔
انہوں نے کہا کہ اوپن یونیورسٹی کا فاصلاتی نظامِ تعلیم ان طلبہ و طالبات کے لیے ایک مناسب موقع فراہم کرتا ہے جو باقاعدہ کلاسز میں شرکت کے بجائے گھر بیٹھ کر اپنی تعلیم جاری رکھنا چاہتے ہیں۔ یونیورسٹی کے خزاں 2026ء کے داخلوں میں مختلف تعلیمی پروگرامز شامل ہیں، جن میں متعلقہ اہلیت رکھنے والے طلبہ و طالبات داخلہ لے سکتے ہیں۔
سلطان روم نے طلبہ و طالبات اور والدین پر زور دیا کہ وہ آخری تاریخ کا انتظار کرنے کے بجائے 5 اکتوبر سے قبل اپنے داخلے کا عمل مکمل کریں تاکہ کسی وجہ سے داخلے سے محرومی یا تعلیمی سال ضائع ہونے کی نوبت نہ آئے۔
انہوں نے مزید کہا کہ داخلوں، پروگرامز، فیس اور دیگر ضروری معلومات کے لیے طلبہ و طالبات علامہ اقبال اوپن یونیورسٹی کی ویب سائٹ یا ریجنل کیمپس تیمرگرہ سے رابطہ کرسکتے ہیں۔