پاکستان

مشیر اوقاف، حج، مذہبی و اقلیتی امور، زکوٰۃ و عشر مولانا طیب قریشی آج ریڈیو پختونخوا کا دورہ کریں گے

نومبر 19, 2026 • Press Release

پشاور: گورنر خیبر پختونخوا کے مشیر برائے اوقاف، حج، مذہبی و اقلیتی امور، زکوٰۃ و عشر مولانا محمد طیب قریشی آج جمعرات (19 نومبر کو) صوبائی حکومت کے نشریاتی ادارے ریڈیو پختونخوا پشاور کا دورہ کریں گے۔

اس موقع پر وہ ریڈیو پختونخوا کے خصوصی پروگرام ‘پېژندګلو’ میں بحیثیت مہمانِ خصوصی شریک ہوں گے۔ پروگرام میں مشیر موصوف سے ان کی شخصیت، خاندانی پس منظر، دینی خدمات کے ساتھ ساتھ زکوٰۃ و عشر کے نظام میں شفافیت، اوقاف املاک کی بحالی، دینی مدارس کے طلباء و طالبات کی تعلیم و تربیت، بین المسالک و بین المذاہب ہم آہنگی اور صوبے میں امن و استحکام جیسے اہم موضوعات پر تفصیلی گفتگو کی جائے گی۔ سامعین بھی ٹیلی فون نمبر 09192144199 پر شام پانچ تا چھ بجے مشیر موصوف سے براہ راست سوالات کر سکتے ہیں۔

پروگرام کے اختتام پر مولانا طیب قریشی ریڈیو پختونخوا کے ان ملازمین اور معاون افسران کو اسنادِ حسنِ کارکردگی بھی دیں گے جنہوں نے اپنی پیشہ ورانہ ذمہ داریوں کی انجام دہی میں نمایاں کارکردگی کا مظاہرہ کیا یا ریڈیو عملے سے تعاون کیا۔

محکمہ اطلاعات کے ترجمان کے مطابق مشیر اوقاف نے اس دورے کو میڈیا اور عوامی رابطے کی اہمیت کے پیشِ نظر اہم قرار دیتے ہوئے کہا ہے کہ ریڈیو پختونخوا صوبے کے عوام تک صحیح اور مثبت پیغام پہنچانے میں کلیدی کردار ادا کر رہا ہے۔ انہوں نے واضح کیا کہ اس طرح کے پروگراموں کے ذریعے عوام کو محکمہ کی ترجیحات اور حکومتی اقدامات سے آگاہی حاصل ہوگی۔