سری نگر: مقبوضہ کشمیر سمیت دنیا بھر میں بسنے والے کشمیری 26 جنوری کو بھارت کے یوم جمہوریہ کو یوم سیاہ کے طور پر منا رہے ہیں۔
کشمیر میڈیا سروس کے مطابق کل جماعتی حریت کانفرنس کی کال پر لائن آف کنٹرول کے دونوں جانب اور دنیا بھر میں کشمیری یوم جمہوریہ کو یوم سیاہ کے طور پر منا رہے ہیں۔
کشمیری برادری کا دنیا بھر میں یوم سیاہ منانے کا مقصد عالمی برادری کو یہ پیغام دینا ہے کہ جنت نظیر خطے کے باسی 70 سال سے بھارتی قبضے اور تشدد کی فضا میں سانس لے رہے ہیں جہاں انہوں نے اپنی آواز بلند کی ہے۔
بھارتی افواج نے کشمیریوں کی بڑھتی ہوئی تعداد پر ظلم کے پہاڑ توڑے ہیں لیکن اس کے باوجود کشمیریوں کے حوصلے بلند ہیں اور وہ بھارتی قبضے کو مسترد کرتے ہوئے اپنی آزادی اور حق خود ارادیت کی جنگ جاری رکھیں گے۔
حریت رہنماؤں کی جانب سے بھارت کے یوم جمہوریہ کو یوم سیاہ کے طور پر منانے کے اعلان پر مودی سرکار نے سری نگر میں غیر اعلانیہ کرفیو نافذ کر دیا ہے۔
وادی میں کسی بھی ممکنہ احتجاج کو روکنے کے لیے قابض بھارتی فوج نے رات سے ہی حریت رہنماؤں اور کارکنوں کی پکڑ دھکڑ شروع کردی تھی۔