ویب ڈیسک: پاکستان نے اقوام متحدہ کے خصوصی نمائندے برائے افغانستان کی تقرری کی حمایت کر دی ہے اور قطر میں افغانستان سے متعلق اقوام متحدہ کی ایک اہم کانفرنس کا انعقاد کیا جا رہا ہے۔
اقوام متحدہ کے زیراہتمام اتوار کو شروع ہونے والی دو روزہ کانفرنس میں 20 ممالک کے نمائندے، انسانی حقوق کے رہنما اور طالبان مخالف حکومت کے نمائندے شرکت کر رہے ہیں۔
دوسری جانب افغانستان کے حکمران طالبان نے اقوام متحدہ کی جانب سے اپنے تحفظات دور کرنے سے انکار کے باعث کانفرنس میں شرکت کی دعوت مسترد کر دی ہے۔
طالبان کا خیال ہے کہ انہیں افغانستان کا حقیقی نمائندہ سمجھا جائے اور ان کی مشاورت کے بعد ہی دیگر نمائندوں کو مدعو کیا جائے۔
دوحہ کانفرنس میں افغانستان کے خصوصی نمائندے سفیر آصف درانی کی قیادت میں پاکستانی وفد کابل میں پاکستانی مشن کے سربراہ اور وزارت خارجہ کے حکام کے ہمراہ شرکت کر رہا ہے۔