اسلام آباد۔24جنوری (اے پی پی):نیشنل کمیشن فار ہیومن ڈویلپمنٹ (این سی ایچ ڈی) نے ملک بھر میں اپنے آپریشنل دائرہ کار کو 128 اضلاع تک وسعت دے دی ہے جس کے نتیجے میں پاکستان کے پسماندہ اور کم انسانی ترقی اشاریہ (ایچ ڈی آئی ) والے علاقوں میں اس کی رسائی نمایاں طور پر مضبوط ہوئی ہے۔ویلتھ پاکستان کو دستیاب دستاویزات کے مطابق این سی ایچ ڈی اس وقت 91 ضلعی دفاتر اور 37 سیٹلائٹ دفاتر کے ذریعے کام کر رہا ہے جس سے ملک کے دور دراز اور محروم علاقوں میں تعلیم، خواندگی اور سماجی ترقی کے پروگرام نچلی سطح تک پہنچائے جا رہے ہیں۔صوبہ وار اعداد و شمار کے مطابق بلوچستان میں 24 ضلعی دفاتر اور دو سیٹلائٹ دفاتر قائم ہیں جبکہ خیبر پختونخوا میں 20 ضلعی دفاتر کے ساتھ سات سیٹلائٹ دفاتر معاونت فراہم کر رہے ہیں۔
سندھ میں کمیشن کے 21 ضلعی دفاتر اور تین سیٹلائٹ دفاتر فعال ہیں جبکہ پنجاب میں آبادی کے حجم اور پروگراموں کی طلب کے پیش نظر 20 ضلعی دفاتر کے ساتھ 15 سیٹلائٹ دفاتر قائم کئے گئے ہیں۔این سی ایچ ڈی نے گلگت بلتستان میں بھی اپنے آپریشنز توسیع دی ہے جہاں دو ضلعی دفاتر اور پانچ سیٹلائٹ دفاتر کام کر رہے ہیں جبکہ آزاد جموں و کشمیر (اے جے کے) میں چار ضلعی دفاتر اور پانچ سیٹلائٹ دفاتر فعال ہیں۔دستاویزات کے مطابق ضلعی دفاتر جان بوجھ کر کم ایچ ڈی آئی درجہ بندی والے علاقوں میں قائم کئے گئے ہیں تاکہ علاقائی تفاوت کم کیا جا سکے اور تعلیم و انسانی ترقی کی خدمات تک رسائی بہتر بنائی جا سکے۔
سیٹلائٹ دفاتر خاص طور پر ان دور دراز علاقوں میں کام کر رہے ہیں جہاں رسائی کے مسائل یا امن و امان کی صورتحال درپیش ہے۔این سی ایچ ڈی کے توسیع شدہ آپریشنل نیٹ ورک کو 2,257 ملازمین پر مشتمل افرادی قوت کی معاونت حاصل ہے جو مختلف اضلاع میں کمیونٹی سطح پر پروگراموں کے نفاذ اور خدمات کی فراہمی میں مصروف ہیں۔مضبوط ضلعی اور سیٹلائٹ دفتراتی نیٹ ورک سے نگرانی، خدمات کی فراہمی اور مقامی شمولیت میں بہتری متوقع ہے، جو جامع اور پائیدار قومی ترقی کے اہداف سے ہم آہنگ ہے۔