لاہور-5 مارچ (اے بی سی):حکومت پنجاب شہریوں کو سستی قیمتوں پر مصدقہ سبزیوں کے بیج فراہم کر کے کچن گارڈننگ کو فروغ دے رہی ہے، ان بیجوں کو گملوں، پلاسٹک بیگز، کریٹس، ڈبوں، کھلی جگہوں یا گھروں کی چھتوں پر بھی آسانی سے کاشت کیا جا سکتا ہے،اس وقت حکومت محکمہ زراعت توسیع کے نیٹ ورک کے ذریعے صوبے کے مختلف اضلاع میں آٹھ گرمیوں کی سبزیوں کے بیجوں پر مشتمل کٹس تقسیم کر رہی ہے۔محکمہ زراعت پنجاب کے کچن گارڈننگ سکیم کے انچارج شاہد اشرف نے ویلتھ پاکستان سے گفتگو کرتے ہوئے بتایا کہ گرمیوں کی سبزیوں کے بیجوں کے کٹس پورے صوبے میں فروخت کے لئے دستیاب ہیں، ان سبزیوں کو کامیابی سے اگا کر کم لاگت اور کیڑے مار ادویات سے پاک سبزیاں حاصل کی جا سکتی ہیں۔اس اقدام کا مقصد خود کفالت کو فروغ دینا، گھریلو غذائیت کو بہتر بنانا اور پائیدار غذائی عادات کی حوصلہ افزائی کرنا ہے تاکہ شہری اور دیہی دونوں علاقوں کے خاندان تازہ اور گھر میں اگائی گئی سبزیوں تک آسانی سے رسائی حاصل کر سکیں۔
ہر کچن گارڈننگ کٹ میں کم از کم آٹھ موسمی سبزیوں کے بیج شامل ہوتے ہیں۔ گرمیوں کے پیکٹس میں اس وقت بھنڈی، کریلا، تورئی، کھیرا، ٹماٹر، ٹینڈا اور مرچوں کے بیج شامل ہیں۔شاہد اشرف کے مطابق کچن گارڈننگ کے حوالے سے عوامی ردعمل حوصلہ افزا رہا ہے اور بہت سے گھرانوں نے گھروں میں کامیابی کے ساتھ سبزیاں اگانا شروع کر دی ہیں۔سبزیوں کے بیجوں کے کٹس محکمہ زراعت توسیع کے ضلعی دفاتر اٹک، بہاولنگر، بہاولپور، بھکر، چکوال، چنیوٹ، ڈیرہ غازی خان، فیصل آباد، گوجرانوالہ، گجرات، جھنگ، جہلم، قصور، میانوالی، راولپنڈی، ساہیوال، سرگودھا اور وہاڑی کے علاوہ لاہور میں واقع محکمہ کے مرکزی دفتر سے بھی حاصل کئے جا سکتے ہیں۔لاہور کے شہریوں کی بڑی تعداد نے کچن گارڈننگ کو نہ صرف مہنگی سبزیوں کی خریداری سے بچنے کا ذریعہ بنایا ہے بلکہ اسے ایک مفید مشغلہ بھی بنا لیا ہے۔لاہور کے نواحی علاقے مانگا منڈی کے رہائشی اشفاق حسین مغل نے بتایا کہ میں اپنے گھر کی چھت پر گرمیوں اور سردیوں کی مختلف سبزیاں اگاتا ہوں، جب بیج اگتے ہیں اور پودوں پر سبزیاں لگنا شروع ہوتی ہیں تو مجھے بے حد خوشی ہوتی ہے۔انہوں نے کہا کہ گھر میں سبزیاں اگانا وقت کو مفید انداز میں گزارنے کا بہترین طریقہ ہے۔
ویجیٹیبل ریسرچ انسٹی ٹیوٹ (وی آر آئی) فیصل آباد بھی پنجاب بھر میں کچن گارڈننگ کے فروغ میں اہم کردار ادا کر رہا ہے جس کا مقصد گھریلو غذائیت کو بہتر بنانا اور خوراک کے اخراجات میں کمی لانا ہے۔وی آر آئی کے پرنسپل سائنٹسٹ ڈاکٹر غضنفر حماد نے بتایا کہ ادارے نے اس سال گرمیوں اور سردیوں دونوں موسموں کے لئے دو لاکھ سے زائد کچن گارڈننگ بیجوں کے کٹس تیار کر کے تقسیم کئے ہیں۔انہوں نے بتایا کہ ہر کٹ میں آٹھ موسمی سبزیوں کے بیج شامل ہوتے ہیں جو پانچ مرلہ گھرانے کے لئے کافی ہوتے ہیں، اس کے ساتھ معلوماتی کتابچے بھی فراہم کئے جاتے ہیں جن میں کچن گارڈننگ کے طریقہ کار اور رہنما اصول بیان کئے گئے ہیں۔یہ کٹس فی پیکٹ صرف 200 روپے کی معمولی قیمت پر دستیاب ہیں جو صرف پیداواری لاگت کو پورا کرتی ہے، اس طرح یہ کم اور متوسط آمدنی والے خاندانوں کے لئے بھی قابل استطاعت ہیں۔
ڈاکٹر غضنفر حماد کے مطابق سبزیوں کی بہترین نشوونما کے لئے درجہ حرارت 20 سے 35 ڈگری سینٹی گریڈ کے درمیان ہونا چاہئے جبکہ پنجاب میں موجودہ موسمی حالات 31 مارچ تک کاشت کے لئے موزوں ہیں۔انہوں نے مزید بتایا کہ وی آر آئی نے 2025 میں سیلاب سے متاثرہ علاقوں میں مفت تقسیم کے لئے سردیوں کی سبزیوں کے دو لاکھ بیجوں کے کٹس بھی تیار کئے تھے جن کی سرپرستی فرٹیلائزر مینوفیکچررز ایسوسی ایشن آف پاکستان نے کی۔ان کے مطابق اس اقدام کا مقصد کمزور طبقات کو گھریلو خوراک کی فراہمی بحال کرنے اور غذائی تحفظ کو بہتر بنانے میں مدد فراہم کرنا ہے۔