لاہور، 9 مارچ(اے بی سی)۔سابق ترجمان بلوچستان حکومت رکن بلوچستان اسمبلی فرح عظیم شاہ نے کہا ہے کہ خواتین کسی بھی معاشرے کی ترقی، خوشحالی اور استحکام میں بنیادی ستون کی حیثیت رکھتی ہیں۔ پاکستان خصوصاً بلوچستان کی خواتین تعلیم، صحت، صحافت، سیاست اور دیگر شعبوں میں نمایاں خدمات انجام دے رہی ہیں۔ خواتین کے عالمی دن کے موقع پر اپنے پیغام میں انہوں نے کہا کہ خواتین کو بااختیار بنانا وقت کی اہم ضرورت ہے تاکہ وہ معاشرے کی تعمیر و ترقی میں بھرپور کردار ادا کر سکیں۔ حکومت اور معاشرے کے تمام طبقات کی ذمہ داری ہے کہ خواتین کو تعلیم، روزگار اور مساوی مواقع فراہم کیے جائیں۔فرح عظیم شاہ نے کہا کہ ایمان پاکستان خواتین کو مستحکم، خودمختار اور خوشحال بنانے کے لیے اہم کردار ادا کر رہی ہے اور مختلف پروگراموں کے ذریعے خواتین کی فلاح و بہبود اور انہیں بااختیار بنانے کے اقدامات کیے جا رہے ہیں۔انہوں نے کہا کہ اسلام نے خواتین کو عزت، احترام اور حقوق عطا کیے ہیں اور ہماری سماجی ذمہ داری ہے کہ ان حقوق کے تحفظ کو یقینی بنایا جائے۔ انہوں نے کہا کہ خواتین کے عالمی دن کا مقصد خواتین کی جدوجہد کو خراج تحسین پیش کرنا اور انہیں درپیش مسائل کے حل کے لیے اجتماعی کوششوں کو فروغ دینا ہے۔انہوں نے اس عزم کا اظہار کیا کہ خواتین کے حقوق کے تحفظ، تعلیم کے فروغ اور معاشی خودمختاری کے لیے اپنی آواز بلند کرتی رہیں گی تاکہ ایک مضبوط اور خوشحال معاشرے کی بنیاد رکھی جا سکے