اسلام آباد۔18مارچ (اے بی سی):خیبر پختونخوا حکومت صوبے بھر میں صحت اور سماجی خدمات کو بہتر بنا کر انسانی سرمایہ مضبوط بنانے کے لیے ایک اہم منصوبے پر عملدرآمد کر رہی ہے۔ویلتھ پاکستان کو دستیاب سرکاری دستاویزات کے مطابق 200 ملین ڈالر کا خیبر پختونخوا ہیومن کیپٹل انویسٹمنٹ پروجیکٹ (کے پی ایچ سی آئی پی)، جو 31 دسمبر 2026 تک مکمل ہونا ہے، مالی لحاظ سے نمایاں پیش رفت حاصل کر چکا ہے اور مجموعی فنڈز کا 95.1 فیصد جاری کیا جا چکا ہے۔یہ منصوبہ 30 مارچ 2021 کو شروع کیا گیا تھا اور اس پر عملدرآمد پلاننگ اینڈ ڈویلپمنٹ ڈیپارٹمنٹ کر رہا ہے۔
اس اقدام کا مقصد بالخصوص کم آمدنی اور کمزور طبقات کے لیے بنیادی خدمات تک رسائی کو بہتر بنانا ہے جبکہ صوبے کے صحت کے شعبے میں ادارہ جاتی بہتری بھی لانا شامل ہے۔ منصوبے کو ابتدائی طور پر پراجیکٹ مینجمنٹ یونٹ سے متعلق مسائل اور 2022 کے سیلاب سے پیدا ہونے والی رکاوٹوں کا سامنا رہا،ان چیلنجز سے نمٹنے کے لیے حکام نے دو مرحلوں پر مشتمل تنظیم نو کا منصوبہ اختیار کیا جس کا مقصد عملدرآمد میں حائل رکاوٹیں دور کرنا اور کارکردگی کو بہتر بنانا تھا،اب منصوبہ دوبارہ رفتار پکڑ چکا ہے اور فنڈز کے مؤثر استعمال سے تکمیل کی جانب پیش رفت جاری ہے۔
کے پی ایچ سی آئی پی عالمی بینک کی جانب سے صوبے میں انسانی سرمائے کی ترقی کو مضبوط بنانے کی وسیع تر کوششوں کا حصہ ہے، جس کا مقصد بنیادی عوامی خدمات کے معیار اور رسائی کو بہتر بنانا ہے۔