اسلام آباد۔3 اپریل (اے بی سی):کابینہ ڈویژن نے پائیدار ترقیاتی اہداف کا حصول پروگرام (ایس اے پی) کے لئے مختص رقم میں 10 ارب روپے اضافے کی تجویز دی ہے جس کے بعد آئندہ مالی سال 27-2026 کے لئے مجموعی تجویز کردہ بجٹ 80 ارب روپے ہو جائے گا۔ویلتھ پاکستان کو دستیاب سرکاری دستاویزات کے مطابق مالی سال 26-2025 کے دوران اس پروگرام کے لئے تخمینہ شدہ اخراجات 70 ارب روپے ہیں، آئندہ مالی سال کے لئے پیش کی گئی یہ تجویز موجودہ سال کے مقابلے میں 10 ارب روپے اضافے کو ظاہر کرتی ہے۔پروگرام کی مجموعی منظور شدہ لاگت 70 ارب روپے ہے جبکہ 30 جون 2025 تک اس پر ہونے والے حقیقی اخراجات 63.98 ارب روپے تک پہنچ چکے ہیں جو مختص فنڈز کے خاطر خواہ استعمال کی عکاسی کرتے ہیں۔دستاویزات کے مطابق اس پروگرام کے تحت فنڈز کا اجراء اور استعمال سٹیئرنگ کمیٹی برائے ایس اے پی کی سفارشات پر کیا جاتا ہے۔ مختص وسائل متعلقہ وفاقی وزارتوں اور صوبائی حکومتوں کے عملدرآمد کرنے والے اداروں کے ذریعے منظور شدہ ایس ڈی جیز اچیومنٹ پروگرام کی ہدایات کے مطابق خرچ کئے جاتے ہیں۔یہ پروگرام 22 جنوری 2019 کو منظور کیا گیا تھا اور پی ایس ڈی پی فریم ورک کے تحت وفاقی اور صوبائی اداروں کی مشترکہ کاوشوں سے مسلسل جاری ہے۔ایس ڈی جیز اچیومنٹ پروگرام ملک بھر میں ترقیاتی ترجیحات کے فروغ کے لئے مختلف ہدفی اقدامات کی حمایت کرتا ہے۔ ان میں غربت میں کمی، تعلیم، صحت کی سہولیات تک رسائی، صنفی مساوات اور ماحولیاتی پائیداری سے متعلق اقدامات شامل ہیں جن میں پسماندہ اور محروم طبقات پر خصوصی توجہ دی جاتی ہے۔پروگرام کے تحت فنڈز کو چھوٹے پیمانے کے مگر زیادہ اثر رکھنے والے منصوبوں کی مالی معاونت کے لئے استعمال کیا جاتا ہے جن کا مقصد معیارِ زندگی کو بہتر بنانا ہے، یہ اقدامات خدمات کی فراہمی میں بہتری، بنیادی سہولیات تک رسائی میں اضافہ اور مقامی سطح پر روزگار کے مواقع پیدا کرنے میں مدد دیتے ہیں۔80 ارب روپے تک مختص رقم میں مجوزہ اضافہ حکومت کے اس عزم کی عکاسی کرتا ہے کہ جاری منصوبوں کو وسعت دی جائے اور پروگرام کے دائرہ کار کو مزید بڑھایا جائے۔