اسلام آباد۔8 اپریل (اے بی سی):سی پیک سے منسلک یارک۔ساگو موٹروے پیکیج پیکیج- 1 پر تعمیراتی کام رواں سال مئی سے دوبارہ شروع ہونے کا امکان ہے۔ویلتھ پاکستان کو دستیاب دستاویزات کے مطابق 50 کلومیٹر طویل ،چار رویہ منصوبے کا آغاز 16 جون 2023 کو کیا گیا تھا اور اب تک اس پر 12.02 فیصد پیش رفت ہو چکی ہے۔نیشنل ہائی وے اتھارٹی کے ایگزیکٹو بورڈ نے باقی ماندہ تعمیراتی کام M/s عمر جان اینڈ کمپنی جوائنٹ وینچر مینا کنسٹرکشن کمپنی کے سپرد کر دیا ہے، جو بقایا کام مکمل کرے گی۔دستاویز کے مطابق کاغذی کارروائی، مشترکہ پیمائش اور نئے ٹھیکیدار کی موبلائزیشن میں تقریباً 2 ماہ لگیں گےجس کے بعد رواں سال مئی سے تعمیراتی سرگرمیوں کے آغاز کا امکان ہے۔منصوبے کی مجموعی پی سی۔I لاگت 76,486 ملین روپے جبکہ پیکیج۔I کے معاہدے کی لاگت 22,886 ملین روپے ہے۔ اس منصوبے کی تکمیل ابتدائی طور پر 15 جون 2025 تک متوقع تھی، تاہم تاخیر کے باعث تکمیل کی نئی تاریخ 3 مئی 2028 مقرر کی گئی ہے۔مالی سال26۔2025 کے لیے اس منصوبے کے تحت پبلک سیکٹر ڈولپمنٹ پروگرام (PSDP) میں 1,000 ملین روپے مختص کیے گئے ہیں۔