سوات بورڈ کے انٹرمیڈیٹ کے نتائج کا اعلان، نجی سکولوں کی طالبات بازی لے گئیں

سوات (سیدشہاب الدین ) سوات بورڈ نے انٹرمیڈیٹ (گیارہویں اور بارہویں جماعت) کے سالانہ امتحانات کے نتائج کا اعلان کر دیا۔ پری میڈیکل گروپ میں ڈان اسکول اینڈ کالج سسٹم سوات کی طالبہ حفصہ عنایت نے 1,155 نمبر حاصل کرکے پہلی پوزیشن حاصل کی، المدینہ کالج امانکوٹ سوات کی طالبہ زرلالہ گوہر نے 1,147 نمبر لے کر دوسری، جبکہ المدینہ کالج امانکوٹ سوات کی طالبہ عروسہ علی خان اور ٹیپو ماڈل اسکول اینڈ کالج کبل سوات کے طالب علم ایقان رحمان نے 1,143، 1,143 نمبر حاصل کرکے مشترکہ طور پر تیسری پوزیشن حاصل کی۔ نتائج کے مطابق بارہویں جماعت میں مجموعی طور پر 32,531 امیدواروں نے امتحان میں حصہ لیا، جن میں سے 21,183 امیدوار کامیاب ہوئے اور کامیابی کا تناسب 65.12 فیصد رہا، جبکہ گیارہویں جماعت میں 31,611 امیدوار امتحان میں شریک ہوئے، جن میں سے 19,772 کامیاب ہوئے اور مجموعی کامیابی کا تناسب 62.55 فیصد رہا۔ پری انجینئرنگ گروپ میں گورنمنٹ ڈگری کالج مینگورہ سوات کے طالب علم خبیب خان نے 1,091 نمبر حاصل کرکے پہلی، اسی کالج کے طالب علم ابان نثار نے 1,081 نمبر لے کر دوسری، جبکہ گورنمنٹ ڈگری کالج مینگورہ سوات ہی کے طالب علم منیب الرحمن نے 1,024 نمبر حاصل کرکے تیسری پوزیشن حاصل کی۔ کمپیوٹر سائنس گروپ میں گورنمنٹ ڈگری کالج مینگورہ سوات کے طالب علم محمد عبدالرحمان نے 1,066 نمبر حاصل کرکے پہلی پوزیشن حاصل کی، دی لیڈرشپ اسکول اینڈ کالج سواڑی بونیر کی طالبہ اقصیٰ خان نے 1,042 نمبر لے کر دوسری، جبکہ اسی ادارے کی طالبہ یاسم سجل نے 992 نمبر حاصل کرکے تیسری پوزیشن حاصل کی۔ ہیومینٹیز گروپ میں انسٹیٹیوٹ آف چلڈرن ہیئرنگ اسپیچ امپیئرمنٹس سوات کے طالب علم محمد سیام نے 1,107 نمبر حاصل کرکے پہلی پوزیشن حاصل کی، اسی ادارے کے طلبہ معاذ خان اور محمد عباس نے 1,083 نمبر حاصل کرکے مشترکہ طور پر دوسری، جبکہ اسی ادارے کی طالبہ عریبہ اور طالب علم شاہ خالد نے 1,082 نمبر حاصل کرکے مشترکہ طور پر تیسری پوزیشن حاصل کی۔ گیارہویں جماعت کے پری میڈیکل گروپ میں 22,257 امیدواروں نے امتحان میں حصہ لیا، جن میں سے 15,107 کامیاب ہوئے اور کامیابی کا تناسب 67.9 فیصد رہا، پری انجینئرنگ گروپ میں 1,409 امیدوار شریک ہوئے، جن میں سے 670 کامیاب ہوئے، کمپیوٹر سائنس گروپ میں 3,070 امیدواروں میں سے 1,254 کامیاب ہوئے، جبکہ ہیومینٹیز گروپ میں 4,879 امیدوار شریک ہوئے، جن میں سے 2,741 کامیاب ہوئے۔ بارہویں جماعت کے پری میڈیکل گروپ میں 24,080 امیدواروں نے امتحان دیا، جن میں سے 17,385 کامیاب ہوئے اور کامیابی کا تناسب 72.2 فیصد رہا، پری انجینئرنگ گروپ میں 1,467 امیدوار شریک ہوئے، جن میں سے 813 کامیاب ہوئے اور کامیابی کا تناسب 55.4 فیصد رہا، کمپیوٹر سائنس گروپ میں 2,491 امیدواروں میں سے 1,114 کامیاب ہوئے اور کامیابی کا تناسب 44.7 فیصد رہا، جبکہ ہیومینٹیز گروپ میں 4,493 امیدواروں نے امتحان دیا، جن میں سے 1,871 کامیاب ہوئے۔
۔۔