سوات: منگلور میں پرانی دشمنی پر فائرنگ، چچازاد بھائیوں کے ہاتھوں چچازاد قتل

سوات (بیورو رپورٹ) سوات کے علاقے منگلور میں پرانی دشمنی کے تنازع پر چچازاد بھائیوں نے فائرنگ کرکے اپنے چچازاد بھائی کو قتل کردیا۔ پولیس کے مطابق عمر علی ولد قدر گل سکنہ اوغز کوکارئی حال منگلور پل کے قریب موجود تھے کہ اس دوران مسلح ملزمان نے ان پر فائرنگ کردی، جس کے نتیجے میں وہ موقع پر ہی جاں بحق ہوگئے۔ واقعے کے بعد مقتول کی لاش منگلور ہسپتال منتقل کردی گئی۔ منگلور پولیس کے مطابق مقتول کی اہلیہ کی مدعیت میں اس کے چچازاد بھائیوں اکبر خان اور فرمان پسران شمس الرحمان ساکنان اوغز کوکارئی کے خلاف قتل کا مقدمہ درج کرلیا گیا ہے جبکہ واقعے کی تفتیش شروع کردی گئی ہے۔ پولیس کا کہنا ہے کہ مقتول عمر علی پر 2024 میں اپنے ہی ایک چچازاد بھائی کو قتل کرنے کا الزام تھا اور وہ اس مقدمے میں تقریباً تین ماہ قبل جیل سے رہائی حاصل کرکے گھر واپس آیا تھا۔ پولیس کے مطابق پرانی دشمنی کے تناظر میں ملزمان نے مبینہ طور پر عمر علی کو نشانہ بنایا۔ پولیس نے واقعے کے مختلف پہلوؤں سے تفتیش شروع کردی ہے اور ملزمان کی گرفتاری کے لیے کارروائی جاری ہے۔
۔۔۔۔۔