عوامی سہولت کے لیے دیر اپر اور چترال لوئر میں کیمپ کورٹس کے انعقاد کا اعلان

سوات (بیورو رپورٹ) کمشنر ملاکنڈ ڈویژن مسعود احمد کی ہدایت پر عوام اور مقدمات کے فریقین کو ان کے مقدمات کی سماعت کے لیے سہولت فراہم کرنے اور غیر ضروری سفری مشکلات سے بچانے کے لیے ایڈیشنل کمشنر ملاکنڈ ڈویژن کی جانب سے دیر اپر اور چترال لوئر میں کیمپ کورٹس کا انعقاد کیا جائے گا۔ جاری شیڈول کے مطابق 13 اکتوبر 2026 کو ایڈیشنل ڈپٹی کمشنر دیر اپر کے دفتر و عدالت میں جبکہ 14 اور 15 اکتوبر 2026 کو اسسٹنٹ کمشنر ہیڈکوارٹر چترال لوئر کے دفتر و عدالت میں کیمپ کورٹس منعقد ہوں گی۔ کیمپ کورٹس کے دوران زیر سماعت ریونیو مقدمات کی سماعت مقررہ تاریخوں پر متعلقہ مقامات پر کی جائے گی تاکہ عوام اور مقدمات کے فریقین کو بروقت انصاف کی فراہمی اور مقدمات کی مؤثر پیروی میں آسانی میسر آسکے۔ متعلقہ حکام کو کیمپ کورٹس کے انعقاد کے لیے ضروری انتظامات یقینی بنانے کی ہدایات بھی جاری کردی گئی ہیں۔
۔۔۔