شہید بینظیر بھٹو یونیورسٹی شرینگل کے نو تعینات وائس چانسلر پروفیسر ڈاکٹر اقبال منیر کا جامعہ کے مختلف شعبہ جات کا دورہ

دیر(بیورو رپورٹ)

شہید بینظیر بھٹو یونیورسٹی شرینگل کے وائس چانسلر پروفیسر ڈاکٹر اقبال منیر نے آج صبح 09:00 بجے جامعہ کے مختلف تعلیمی شعبہ جات کا اچانک دورہ دورہ کیا۔ اس موقع پر انہوں نے اساتذہ اور سپورٹنگ اسٹاف سے ملاقاتیں کیں، کلاس رومز اور لیبارٹریز کا معائنہ کیا اور تعلیمی و تحقیقی سرگرمیوں کا جائزہ لیا۔

دورے کے دوران وائس چانسلر نے شعبہ فارمیسی، شعبہ بائیو ٹیکنالوجی، شعبہ ایگریکلچرل اور شعبہ باٹنی کے کلاس رومز، سیمینار ہالز اور لیبارٹریز کا وزٹ کیا۔ شعبہ جات کے سربراہان نے وائس چانسلر کو خوش آمدید کہا اور اپنے اپنے شعبہ جات سے متعلق بریفنگ پیش کی، جس میں تعلیمی معیار، تحقیقی پیش رفت، سہولیات اور درپیش چیلنجز پر روشنی ڈالی گئی۔

اس موقع پر گفتگو کرتے ہوئے وائس چانسلر پروفیسر ڈاکٹر اقبال منیر نے کہا کہ جامعہ کا بنیادی مقصد معیاری تعلیم اور تحقیقی میدان میں بہترین ماحول فراہم کرنا ہے۔ انہوں نے زور دیا کہ طلباء، اساتذہ اور متعلقہ عملے کی سو فیصد حاضری کو یقینی بنایا جائے گا اور شعبہ جات میں درپیش کسی بھی کمی کو ترجیحی بنیادوں پر پورا کیا جائے گا۔

انہوں نے کہا کہ طلباء کے مسائل کے ازالے اور انہیں تمام تر ضروری سہولیات کی فراہمی کے لیے ہر ممکن کوشش کی جائے گی، کیونکہ طلباء ہمارا قیمتی سرمایہ اور روشن مستقبل کے معمار ہیں۔

وائس چانسلر نے شعبہ جات کے سربراہان کو ہدایات جاری کرتے ہوئے کہا کہ وہ آج ہی اپنے مکمل اسٹاف کے ساتھ میٹنگ کریں اور نئے تعلیمی عزم کے ساتھ انہیں واضح ذمہ داریاں سونپیں۔ انہوں نے وقت کی پابندی، فرائض کی ادائیگی میں ایمانداری اور اخلاص نیت پر زور دیتے ہوئے کہا کہ طلباء کو بہترین سہولیات فراہم کرنے کے لیے عملہ ہر وقت تیار رہے۔

انہوں نے خبردار کیا کہ لاپرواہی، کوتاہی یا غفلت برتنے پر سخت کارروائی کی جائے گی، جبکہ صفائی ستھرائی کے معاملے میں کسی قسم کی نرمی برداشت نہیں کی جائے گی۔ تمام تر ضروریات کو یقینی بنایا جائے گا تاکہ تعلیمی ماحول کو مزید بہتر اور موثر بنایا جا سکے۔

انہوں نےاس عزم کا اظہار کیا کہ جامعہ کو تعلیمی و تحقیقی میدان میں نمایاں مقام دلانے کے لیے اجتماعی کوششیں جاری رکھی جائیں گی اور ہر شعبہ کو جدید تقاضوں کے مطابق ترقی دی جائے گی۔