سوات: الہ آبادمیں جائیداد کے تنازعہ پر قتل ہونے والے دو بھائیوں کے کیس میں 5 ملزمان گرفتار

سوات (بیورورپورٹ) سوات کی تحصیل چارباغ کے الہ آباد میں دو روز قبل جائیداد کے تنازعہ پر بھائیوں کے درمیان فائرنگ کے نتیجے میں یعقوب خان اور رسول خان پسران اکرم خان جاں بحق جبکہ عصمت اللہ زخمی ہوگیا تھا۔ واقعہ کے حوالے سے تھانہ چارباغ میں کراس ورژن مقدمہ درج کیا گیا تھا۔ ایس ایچ او تھانہ چارباغ نثار الدین نے پولیس ٹیم کے ہمراہ کارروائی کرتے ہوئے واقعے میں ملوث پانچ ملزمان سجاد، معراج پسران یعقوب خان، رحمت اللہ، یوسف خان اور رستم خان پسران اکرم خان ساکنان گلی باغ کو گرفتار کرلیا۔ سوات پولیس کے ترجمان کے مطابق واقعہ بھائیوں کے درمیان جائیداد کے تنازعہ پر پیش آیا، جس میں مبینہ طور پر بھتیجے کی فائرنگ سے چچا جبکہ بھائی کے کلہاڑی کے وار سے دوسرا بھائی جاں بحق ہوا۔ پولیس نے گرفتار ملزمان کے خلاف مزید قانونی کارروائی شروع کردی ہے۔