سوات میں گرینڈ پرسیمَن فیسٹیول، جاپانی پھل کی پیداوار، ویلیو ایڈیشن اور برآمدات کے فروغ پر زور

سوات (سیدشہاب الدین ) محکمہ زراعت شعبہ توسیع سوات کے زیر اہتمام مینگورہ بائی پاس ایلیگنٹ ہال میں گرینڈ پرسیمَن فیسٹیول کا انعقاد کیا گیا، جس میں محکمہ زراعت کے اعلیٰ افسران، زمینداروں، کاشتکاروں، زرعی کمپنیوں، پیسٹی سائیڈ ڈیلرز اور زراعت سے وابستہ افراد نے بھرپور شرکت کی۔ تقریب سے ایڈیشنل کمشنر ملاکنڈ ڈویژن نور عالم، ڈسٹرکٹ ڈائریکٹر زراعت سوات ڈاکٹر افتخار احمد، ڈسٹرکٹ ڈائریکٹر زراعت اپر سوات ڈاکٹر عدالت خان، ڈسٹرکٹ ڈائریکٹر زراعت شانگلہ ڈاکٹر شاہ عالم، ڈائریکٹر تحقیقاتی ادارہ مینگورہ سوات ڈاکٹر محمد روشن اور دیگر مقررین نے خطاب کیا۔ ایڈیشنل کمشنر ملاکنڈ ڈویژن نور عالم نے گرینڈ پرسیمَن فیسٹیول کے انعقاد کو قابل تحسین اقدام قرار دیتے ہوئے کہا کہ ایسی سرگرمیوں سے زمینداروں اور کاشتکاروں کو اپنی پیداوار کی نمائش، جدید زرعی طریقوں، مارکیٹنگ، پروسیسنگ اور برآمدات کے حوالے سے مفید معلومات ملتی ہیں، جس سے انہیں اپنی پیداوار کی بہتر قیمت حاصل کرنے میں مدد ملتی ہے۔ ڈسٹرکٹ ڈائریکٹر زراعت سوات ڈاکٹر افتخار احمد نے جاپانی پھل پرسیمَن کی غذائی، معاشی اور زرعی اہمیت پر روشنی ڈالتے ہوئے کہا کہ سوات میں اس پھل کی پیداوار کے وسیع امکانات موجود ہیں، جدید طریقہ کاشت، بہتر باغبانی اور بروقت زرعی رہنمائی سے پیداوار اور معیار میں مزید اضافہ کیا جاسکتا ہے، جبکہ خشک مصنوعات اور دیگر ویلیو ایڈڈ اشیاء کی تیاری سے زمینداروں کی آمدن بھی بڑھائی جاسکتی ہے۔ سرٹیفیکیشن آفیسر سید عمران شاہ نے بتایا کہ پرسیمَن کی ویلیو ایڈیشن اور مصنوعات کو عالمی منڈی کے تقاضوں سے ہم آہنگ کرنے کے لیے خصوصی منصوبے پر کام جاری ہے اور متعلقہ مصنوعات کے لیے آئی ایس او سرٹیفیکیشن کے حصول کی کوششیں کی جارہی ہیں، جس سے معیاری مصنوعات کی عالمی منڈیوں میں برآمد کے مواقع مزید بڑھیں گے۔ ڈاکٹر عدالت خان، ڈاکٹر شاہ عالم اور ڈاکٹر محمد روشن نے بھی پرسیمَن کی جدید کاشت، معیاری پیداوار، بہتر پیکنگ، پروسیسنگ اور مارکیٹنگ پر زور دیتے ہوئے کہا کہ تحقیق اور جدید زرعی ٹیکنالوجی کے ذریعے اس منافع بخش پھل کی پیداوار اور برآمدات میں نمایاں اضافہ کیا جاسکتا ہے۔ ڈاکٹر نسیم خان نے محکمہ زراعت شعبہ توسیع سوات اور بالخصوص ڈاکٹر افتخار احمد کی کاوشوں کو سراہتے ہوئے کہا کہ ایسے پروگرام زمینداروں کو جدید زرعی معلومات اور مارکیٹ سے جوڑنے میں اہم کردار ادا کرتے ہیں۔ چیئرمین پیسٹی سائیڈ کمپنیز ملاکنڈ ڈویژن لال محمد نے بھی محکمہ زراعت کی خدمات اور زمینداروں کی رہنمائی کے لیے اقدامات کو قابل تحسین قرار دیا۔ فیسٹیول کے دوران مختلف زرعی ادویات، پیسٹی سائیڈ کمپنیوں اور ڈیلرز کی جانب سے خصوصی اسٹالز لگائے گئے، جہاں شرکاء کو جدید زرعی مصنوعات، ادویات اور کاشتکاری سے متعلق معلومات فراہم کی گئیں۔ تقریب کے اختتام پر ایڈیشنل کمشنر ملاکنڈ ڈویژن نور عالم، سابق تحصیل چیئرمین کبل سعید خان اور ڈسٹرکٹ ڈائریکٹر زراعت سوات ڈاکٹر افتخار احمد نے اسٹالز لگانے والی زرعی ادویات اور پیسٹی سائیڈ کمپنیوں و ڈیلرز کے نمائندوں میں تعریفی اسناد تقسیم کیں۔ شرکاء نے گرینڈ پرسیمَن فیسٹیول کو سراہتے ہوئے کہا کہ ایسے پروگرام نہ صرف زمینداروں کی رہنمائی بلکہ زرعی پیداوار میں اضافے، ویلیو ایڈیشن، بہتر مارکیٹنگ اور ملکی و غیر ملکی برآمدات کے فروغ میں بھی اہم کردار ادا کرتے ہیں۔
۔۔۔۔