خیبر پختونخوا کے پہاڑی علاقوں میں زرعی ترقی کے لیے اہم ورکشاپ

سوات (بیورو رپورٹ) انٹرنیشنل سینٹر فار انٹیگریٹڈ ماؤنٹین ڈیولپمنٹ (آئی سی آئی ایم او ڈی) نے محکمہ زراعت خیبر پختونخوا کے اشتراک سے اسلام آباد میں صوبے کے پہاڑی علاقوں میں زرعی ترقی، جدید زرعی طریقوں کے فروغ اور زراعت کو درپیش چیلنجز سے نمٹنے کے حوالے سے ایک اہم ورکشاپ کا انعقاد کیا، جس میں پہاڑی علاقوں میں زرعی مسائل، قدرتی وسائل کے مؤثر استعمال اور پائیدار زرعی ترقی کے امکانات کا جائزہ لیا گیا۔ ورکشاپ میں موسمیاتی تبدیلیوں کے اثرات، پانی کے بہتر استعمال، فصلوں کی پیداوار میں اضافے اور کاشتکاروں کو درپیش مشکلات پر تبادلہ خیال کیا گیا۔ اس موقع پر ڈسٹرکٹ ڈائریکٹر زراعت سوات ڈاکٹر افتخار احمد نے محکمہ زراعت خیبر پختونخوا کی سرگرمیوں، ذمہ داریوں اور دائرہ کار کے حوالے سے تفصیلی پریزنٹیشن پیش کی۔ انہوں نے کاشتکاروں کو زرعی رہنمائی فراہم کرنے، جدید زرعی ٹیکنالوجی متعارف کرانے اور زرعی پیداوار میں بہتری لانے کے لیے محکمہ زراعت کی جاری سرگرمیوں کو اجاگر کیا۔ ڈاکٹر افتخار احمد نے کہا کہ پہاڑی علاقوں میں زرعی ترقی کے لیے مقامی موسمی حالات، زمین کی ساخت اور دستیاب قدرتی وسائل کو مدنظر رکھتے ہوئے منصوبہ بندی ضروری ہے تاکہ کاشتکار زیادہ سے زیادہ فوائد حاصل کر سکیں۔ انہوں نے جدید اور پائیدار زرعی طریقوں کے فروغ کو دیہی معیشت کی بہتری اور کاشتکاروں کے معاشی استحکام کے لیے اہم قرار دیا۔ ورکشاپ میں سرکاری اداروں، تحقیقی مراکز اور ترقیاتی تنظیموں کے درمیان مؤثر رابطہ کاری کی ضرورت پر بھی زور دیا گیا اور اس امید کا اظہار کیا گیا کہ مشترکہ کوششوں سے پہاڑی علاقوں میں زرعی پیداوار بہتر بنانے، قدرتی وسائل کے مؤثر استعمال اور مقامی آبادی کے روزگار کے مواقع بڑھانے میں مدد ملے گی