سابق وفاقی وزیر مرتضیٰ جاوید عباسی کو پاکستان بیت المال بورڈ کا رکن مقرر ہونے پر مسلم لیگ (ن) اپر چترال کی مبارک باد

پاکستان مسلم لیگ (ن) اپر چترال کے صدر، کابینہ اور کارکنان نے سابق وفاقی وزیر اور پاکستان مسلم لیگ (ن) خیبرپختونخوا کے جنرل سیکریٹری جناب مرتضیٰ جاوید عباسی صاحب کو پاکستان بیت المال بورڈ کا رکن مقرر ہونے پر دلی مبارک باد پیش کی ہے۔
پاکستان مسلم لیگ (ن) اپر چترال نے امید ظاہر کی ہے کہ مسلم لیگ (ن) کے وفادار اور دیرینہ کارکن، سابق وفاقی وزیر اور صوبائی جنرل سیکریٹری جناب مرتضیٰ جاوید عباسی صاحب اپنی بہترین صلاحیتوں کو بروئے کار لاتے ہوئے نہ صرف تفویض کردہ عہدے کے شایانِ شان خدمات انجام دیں گے بلکہ خیبرپختونخوا میں پاکستان مسلم لیگ (ن) کو مزید فعال اور مضبوط بنانے، نیز پارٹی کارکنان کو متحد اور متحرک کرنے میں بھی کلیدی کردار ادا کریں گے۔
اس موقع پر پاکستان مسلم لیگ (ن) اپر چترال کے صدر، سابق مشیر سید احمد خان، کابینہ اور کارکنان جناب مرتضیٰ جاوید عباسی صاحب کو دلی مبارک باد پیش کرتے ہوئے گزارش کرتے ہیں کہ ضلع اپر چترال ایک نوزائیدہ اور انتہائی پسماندہ ضلع ہے۔ گزشتہ ادوار میں نہ صرف اپر چترال بلکہ پاکستان مسلم لیگ (ن) کے مخلص کارکنان کو بھی نظرانداز کرکے احساسِ محرومی کا شکار بنایا گیا، بلکہ بعض کارکنان کو مبینہ طور پر انتقامی سیاست کا نشانہ بھی بنایا گیا۔
اسی طرح ماضی میں زکوٰۃ اور بیت المال کی رقوم کی تقسیم کے حوالے سے بھی متعدد شکایات سامنے آتی رہی ہیں۔ جناب والا سے مؤدبانہ گزارش ہے کہ ذمہ داریوں کی تقسیم اور مستحقین تک امداد کی فراہمی کے نظام کو شفاف بناتے ہوئے پاکستان مسلم لیگ (ن) کے مخلص اور دیرینہ کارکنان کے احساسِ محرومی کو بھی مدنظر رکھا جائے اور ضلع اپر چترال کو خصوصی اہمیت دی جائے۔
ہم امید کرتے ہیں کہ جناب مرتضیٰ جاوید عباسی صاحب اپنی نئی ذمہ داری میں میرٹ، شفافیت اور عوامی خدمت کو مقدم رکھتے ہوئے مستحق افراد تک ان کا حق پہنچانے میں اپنا بھرپور کردار ادا کریں گے۔