پاکستان

بینظیر انکم سپورٹ پروگرام میں رجسٹریشن کے لئے مزید سات موبائل وینز شامل کرنے کا فیصلہ

نومبر 17, 2026 • Press Release

اسلام آباد۔17نومبر (اے بی سی):بینظیر انکم سپورٹ پروگرام (بی آئی ایس پی) دور دراز اور سہولیات سے محروم علاقوں میں مستحق اور کمزور طبقات تک رجسٹریشن اور سروے کی سہولیات پہنچانے کے لئے اپنی موجودہ 25 موبائل رجسٹریشن وینز میں مزید سات وینز شامل کر رہا ہے جس کے بعد ان کی مجموعی تعداد 32 ہو جائے گی۔ویلتھ پاکستان کو دستیاب سرکاری دستاویزات کے مطابق اضافی موبائل وینز سے رجسٹریشن کی خدمات کا دائرہ وسیع ہوگا خصوصاً دور افتادہ اور دشوار گزار علاقوں میں، جن میں خیبرپختونخوا کے نئے ضم شدہ اضلاع بھی شامل ہیں جہاں رجسٹریشن کی سہولیات تک رسائی اب بھی ایک چیلنج ہے۔دستاویز کے مطابق بی آئی ایس پی کی موجودہ 25 موبائل رجسٹریشن وینز میں سے 16 بلوچستان، پانچ سندھ، تین خیبرپختونخوا اور ایک اسلام آباد میں موجود ہے۔

مزید سات گاڑیوں کی شمولیت سے قومی سماجی و اقتصادی رجسٹری (این ایس ای آر) میں اپنے گھرانوں کی رجسٹریشن کرانے کے خواہشمند افراد کی معاونت کے لئے پروگرام کی صلاحیت میں اضافہ متوقع ہے۔دستاویز میں مزید بتایا گیا ہے کہ بی آئی ایس پی نے ملک بھر میں تحصیل کی سطح پر 647 ڈائنامک رجسٹری سینٹرز (ڈی آر سیز) قائم کئے ہیں جہاں گھرانوں کی مفت رجسٹریشن کی سہولت فراہم کی جاتی ہے۔یہ مراکز این ایس ای آر کے متحرک رجسٹری نظام کے تحت کام کرتے ہیں جس کے ذریعے شہری کسی نئے ملک گیر سروے کا انتظار کئے بغیر اپنے گھرانوں کی رجسٹریشن کرا سکتے ہیں اور اپنی سماجی و اقتصادی معلومات کو اپ ڈیٹ کر سکتے ہیں۔ قومی سماجی و اقتصادی رجسٹری ابتدائی طور پر مالی سال 11۔2010کے دوران ملک بھر میں گھر گھر سروے کے ذریعے تیار کی گئی تھی۔ بعد ازاں فروری 2023 میں ملٹی پل انٹری لوکلائزڈ ایکسس (میلا) طریقہ کار کے تحت اسے ایک متحرک رجسٹری میں تبدیل کر دیا گیا۔

دستاویز کے مطابق اس رجسٹری میں 3 کروڑ 87 لاکھ سے زائد گھرانوں کا سماجی و اقتصادی ڈیٹا موجود ہے جن میں سے تقریباً ایک کروڑ 2 لاکھ گھرانے بی آئی ایس پی کے مختلف پروگراموں کے تحت مالی معاونت حاصل کر رہے ہیں۔مستحق افراد کے انتخاب کے لئے بی آئی ایس پی پراکسی مینز ٹیسٹ (پی ایم ٹی) استعمال کرتا ہے جس کے ذریعے 43 اشاریوں کی بنیاد پر گھرانوں کی سماجی و اقتصادی صورتحال کا جائزہ لیا جاتا ہے۔ان اشاریوں میں گھرانے کے افراد کی تعداد، تعلیم، روزگار کی صورتحال، معذوری، اثاثے، زراعت اور صحت سمیت مختلف عوامل شامل ہیں۔

متعلقہ غیر مشروط نقد مالی معاونت کے پروگرام کے تحت ایسے گھرانے جن کا پی ایم ٹی سکور 32 یا اس سے کم ہو، مالی امداد کے لئے غربت کے سکور کی مقررہ شرط پوری کرتے ہیں جبکہ معذور افراد پر مشتمل گھرانوں کے لئے اہلیت کی حد 37 مقرر ہے۔نیشنل ڈیٹابیس اینڈ رجسٹریشن اتھارٹی (نادرا) کے پاس تسلیم شدہ صنفی زمرے کے تحت رجسٹرڈ خواجہ سرا افراد، جن کا این ایس ای آر کے ذریعے سروے ہو چکا ہو، متعلقہ پروگرام کی دیگر شرائط پوری کرنے کی صورت میں پی ایم ٹی سکور کی پابندی کے بغیر پروگرام میں شامل ہونے کے اہل ہیں۔

بی آئی ایس پی مستحق افراد کی معلومات کی تصدیق کے لئے سرکاری ڈیٹابیسز سے بھی موازنہ کرتا ہے جن میں ملازمت، پنشن، ایکسائز اور ٹیکسیشن کے ریکارڈ شامل ہیں۔اس اقدام کا مقصد مستحق گھرانوں کی زیادہ درست نشاندہی کرنا اور اس بات کو یقینی بنانا ہے کہ مالی معاونت حقیقی طور پر اہل اور ضرورت مند گھرانوں تک پہنچے۔