عالمی یوم ٹیلی ویژن؛ حقیقت، عدالت اور مظلوموں کی آواز کا عکاس
تحریر؛ عمران خان شاہیخیل
عالمی یوم ٹیلی ویژن ہر سال 21 نومبر کو پوری دنیا میں نہایت عقیدت، محبت اور شعور کے ساتھ منایا جاتا ہے، اور یہ دن محض ایک ایجاد کی یاد نہیں بلکہ اس عظیم انقلاب کی یاد دہانی ہے جس نے انسان کے دیکھنے، سننے، سوچنے، سمجھنے اور دنیا کو جاننے کا انداز ہی بدل کر رکھ دیا ہے۔ ٹیلی ویژن صرف ایک آلہ یا ایک اسکرین نہیں ہے بلکہ یہ دنیا کی سب سے بڑی، سب سے روشن اور سب سے سچی کھڑکی ہے جو دور دراز ملکوں، شہروں، گاؤں، پہاڑوں، صحراؤں اور سمندروں کو ہمارے گھروں کے اندر لے آتی ہے، یہ ایک ایسا صاف و شفاف آئینہ ہے جس میں معاشرے کی حقیقی تصویر بغیر کسی بناوٹ کے نظر آتی ہے، اور یہ ایک ایسی طاقتور آواز ہے جو مظلوم کی فریاد کو ظالم کے مضبوط ایوانوں تک پہنچا دیتی ہے اور دنیا کے ضمیر کو جھنجھوڑ کر رکھ دیتی ہے۔ جب ٹیلی ویژن ایجاد ہوا تو کسی نے سوچا بھی نہیں تھا کہ ایک چھوٹا سا ڈبہ ایک دن دنیا کی سب سے بڑی طاقت بن جائے گا، لیکن آج حقیقت یہ ہے کہ دنیا کے کسی بھی کونے میں ہونے والا واقعہ چند لمحوں میں، چند سیکنڈوں میں پوری دنیا کے سامنے آ جاتا ہے، کہیں جنگ ہو، کہیں سیلاب آئے، کہیں زلزلہ آئے، کہیں ظلم ہو، کہیں حادثہ ہو یا کہیں خوشی کا موقع ہو، ٹیلی ویژن سب سے پہلے وہاں پہنچ کر حقیقت کو بغیر کسی پردے، بغیر کسی خوف اور بغیر کسی ملاوٹ کے عوام تک پہنچاتا ہے۔ اسی وجہ سے ٹیلی ویژن کو جمہوریت کا چوتھا ستون کہا جاتا ہے، کیونکہ جب زبانوں پر تالے لگ جائیں، جب قلم خاموش ہو جائیں اور جب سچ بولنا مشکل ہو جائے تو ٹیلی ویژن کی اسکرین بول پڑتی ہے اور سچ کو دنیا کے سامنے بے نقاب کر دیتی ہے۔ تاریخ اس بات کی روشن گواہ ہے کہ جہاں کہیں بھی مظلوموں پر ظلم ہوا وہاں ٹیلی ویژن نے ان کی آواز بن کر انصاف دلانے میں سب سے اہم اور سب سے نمایاں کردار ادا کیا، فلسطین کے معصوم بچوں کی چیخیں ہوں، کشمیر کی ماؤں کے آنسو ہوں، برما کے مظلوموں کی آہیں ہوں، یا دنیا کے کسی بھی خطے میں ہونے والی ناانصافی ہو، ٹیلی ویژن نے ہمیشہ مظلوم کے ساتھ کھڑے ہو کر ظالم کو بے نقاب کیا ہے، اس کے چہرے سے نقاب اتارا ہے اور دنیا کو بتایا ہے کہ ظلم کتنا ہی طاقتور کیوں نہ ہو، سچ اس سے زیادہ طاقتور ہے۔ ٹیلی ویژن ایک ایسا عظیم منبر ہے جہاں ایک غریب کسان بھی اپنی بات کہہ سکتا ہے، ایک عام مزدور بھی اپنے حق کے لیے آواز بلند کر سکتا ہے، ایک بے بس ماں بھی اپنے بیٹے کے انصاف کے لیے پوری دنیا سے فریاد کر سکتی ہے، اور ایک عام شہری بھی حکمرانوں سے سوال کر سکتا ہے۔ یہی اس کی اصل طاقت ہے، یہی اس کی اصل خوبصورتی ہے اور یہی اس کا اصل مقصد ہے۔ اس کا کردار صرف خبروں تک محدود نہیں ہے بلکہ یہ بچوں کی تعلیم، نوجوانوں کی تربیت، خواتین کی آگاہی، کسانوں کی رہنمائی، مریضوں کی معلومات، طلباء کی حوصلہ افزائی اور معاشرے کی اصلاح کا سب سے بڑا استاد بھی ہے، اچھے ڈرامے، معلوماتی پروگرام، دینی و اخلاقی نشریات، سائنسی دستاویزی فلمیں، کھیلوں کے مقابلے اور تعلیمی پروگرام قوموں کی ذہنی تربیت کرتے ہیں، ان کے دلوں میں حب الوطنی پیدا کرتے ہیں اور انہیں ترقی و خوشحالی کی راہ پر گامزن کرتے ہیں۔ ایک اچھا ٹیلی ویژن چینل ایک اچھے استاد کی طرح ہوتا ہے جو خاموشی سے، محبت سے اور مسلسل قوم کو سکھاتا رہتا ہے۔ لیکن اس طاقت کے ساتھ ایک بہت بڑی ذمہ داری بھی جڑی ہوئی ہے، ٹیلی ویژن کو چاہیے کہ وہ سنسنی کے بجائے سچ کو ترجیح دے، نفرت کے بجائے محبت کو پھیلائے، جھوٹ کے بجائے حقیقت کو دکھائے، افواہ کے بجائے تحقیق کو آگے رکھے اور تفریح کے نام پر بے حیائی کے بجائے اخلاق، تہذیب، شرافت اور انسانی اقدار کو فروغ دے، کیونکہ جو چیز روزانہ لاکھوں گھروں میں دیکھی جاتی ہے وہی قوم کی سوچ بن جاتی ہے، وہی بچوں کے ذہن بناتی ہے اور وہی آنے والی نسلوں کی تربیت کرتی ہے۔ اگر ٹیلی ویژن سچ دکھائے گا تو قوم سچ پر چلے گی، اگر وہ انصاف کی بات کرے گا تو معاشرے میں انصاف آئے گا، اور اگر وہ محبت پھیلائے گا تو نفرتیں ختم ہو جائیں گی۔ اس لیے عالمی یوم ٹیلی ویژن کے موقع پر ہمیں یہ عہد کرنا چاہیے کہ ہم ٹیلی ویژن کو سچائی، انصاف، امن، محبت اور انسانیت کی خدمت کے لیے استعمال کریں گے، اسے مظلوم کی آواز بنائیں گے، ظالم کے خلاف ڈھال بنائیں گے، غریب کے حق کا محافظ بنائیں گے اور قوم کی صحیح رہنمائی کا ذریعہ بنائیں گے، کیونکہ جب ٹیلی ویژن سچ بولتا ہے تو دنیا جاگ جاتی ہے، جب وہ مظلوم کی آواز بنتا ہے تو عدالت حرکت میں آ جاتی ہے، جب وہ حق کا پرچم بلند کرتا ہے تو باطل کے قدم ڈگمگا جاتے ہیں اور جب وہ اپنا فرض ایمانداری سے نبھاتا ہے تو معاشرہ اندھیروں سے نکل کر روشنی کی طرف بڑھ جاتا ہے۔ ٹیلی ویژن زندہ باد، سچ زندہ باد، انصاف زندہ باد اور مظلوموں کی آواز ہمیشہ زندہ باد۔