لاہور: وزیراعظم کی معاون خصوصی برائے انسانی حقوق و ترقی نسواں مشعال حسین ملک نے لاہور پریس کلب میں پریس کانفرنس کے دوران کہا کہ نسلی عصبیت اور بالادستی کی شکار بھارتی ریاست کو کشمیر میں اپنا یوم جمہوریہ منانے کا کوئی حق نہیں۔
جیل میں بند کشمیری حریت رہنما محمد یاسین ملک کی اہلیہ مشعال حسین ملک نے ایک ویڈیو بیان میں آر ایس ایس کی زیرقیادت بھارتی حکومت کو آئین کی تنسیخ کا جشن منانے، اقلیتوں کو نشانہ بنانے اور نام نہاد جمہوری اقدار کو مجروح کرنے پر تنقید کا نشانہ بنایا۔
معاون خصوصی نے کہا کہ آر ایس ایس سے متاثر فاشسٹ حکومت کی طرف سےاختلافی آوازوں کو دبانے کے لیے ریاستی دہشت گردی اور ظلم و بربریت کی لہر میں تیزی آئی ہے۔
مشعال ملک نے کہا کہ بھارت بہادر کشمیری عوام کے حوصلے کو پست نہیں کر سکتا۔ انہوں نے کہا کہ کشمیری عوام اپنی پیدائشی حق خودارادیت حاصل کرنے تک اپنی جدوجہد آزادی جاری رکھیں گے۔
لائن آف کنٹرول کے دونوں جانب اور دنیا بھر میں مقیم کشمیریوں نے بھارت کی جانب سے کشمیریوں کے حق خود ارادیت سے مسلسل انکار کے خلاف بھارت کے یوم جمہوریہ کو یوم سیاہ کے طور پر منایا۔
معاون خصوصی نے مزید کہا کہ بھارت کا بھارتی غیر قانونی مقبوضہ جموں و کشمیر پر غیر قانونی قبضے کے باوجود خود کو جمہوریہ کہنا شرمناک ہے۔ انہوں نے کہا کہ بھارت نے جموں وکشمیر کو دنیا کے سب سے بڑے ٹارچر سیل میں تبدیل کر دیا ہے۔
مشعال ملک نے کہا کہ بدنام زمانہ بھارتی حکام نے کشمیریوں کے بنیادی حقوق سلب کیے ہوئے ہیں اور یاسین ملک سمیت اعلیٰ کشمیری قیادت کو صرف ان کی آواز کو خاموش کرنے کے لیے جھوٹے اور من گھڑت مقدمات میں جیلوں میں قید کیا ہوا ہے۔
معاون خصوصی نے کہا کہ بھارت کے کشمیری عوام پر بدترین مظالم کا ارتکاب اور کشمیریوں کے تمام قانونی اور آئینی حقوق غصب کرنے کے باوجود عالمی برادری، اقوام متحدہ کے ادارے اور انسانی حقوق کے اداروں کی جانب سے اسے پھر بھی سب سے بڑی جمہوریت قرار دینا قابل افسوس ہے۔
یاسین ملک کی اہلیہ نے کہا کہ بھارت دنیا کی سب سے بڑی جمہوریت نہیں بلکہ دنیا کی سب سے بڑی فاشسٹ اور نسلی عصبیت رکھنے والا ریاست ہے جہاں نہ صرف کشمیری مسلمانوں بلکہ دیگر تمام اقلیتی برادریوں کو غیر انسانی اور وحشیانہ کارروائیوں کا نشانہ بنایا جا رہا ہے۔
مشعال ملک نے اس عزم کا اظہار کیا کہ بھارتی فوج کے مظالم کے باوجود کشمیری عوام اپنی جدوجہد سے دستبردار نہیں ہوں گے اور جدوجہد آزادی کو اس کے منطقی انجام تک پہنچانے تک جدوجہد جاری رکھیں گے۔
انہوں نے کہا کہ بھارتی غیر قانونی مقبوضہ جموں وکشمیر کی موجودہ صورتحال عالمی برادری کے لیے ایک بڑا چیلنج ہے۔ انہوں نے عالمی طاقتوں پر زور دیا کہ وہ تنازعہ کشمیر کو اقوام متحدہ کی قراردادوں اور کشمیری عوام کی امنگوں کے مطابق حل کرنے میں مدد کریں تاکہ دنیا کو بدترین انسانی بحران سے بچا جا سکے۔
مشعال ملک نے کہا کہ بھارتی وزیر اعظم نریندر مودی نے اس جگہ جہاں پر ہندوتوا کے ہجوم کے ہاتھوں شہید ہونے والی صدیوں پرانی بابری مسجد کھڑی تھی پر رام مندر کا افتتاح کرکے مسلمانوں سے اپنی نفرت دکھائی ہے۔
معاون خصوصی نے مزید کہا کہ آر ایس ایس کی طرف سے فروغ دی جانے والی تفرقہ انگیز پالیسیوں کی وجہ سے ہندوستان کو بالآخر ٹوٹ پھوٹ کا سامنا کرنا پڑے گا۔