اسلام آباد-19مئی (اے بی سی):بلوچستان کی جامعات کو مالی سال 26۔2025کے دوران ہائیر ایجوکیشن کمیشن (ایچ ای سی) کی جانب سے 2 ارب 92 کروڑ 78 لاکھ روپے سے زائد کی مالی معاونت فراہم کی گئی جو صوبے میں اعلیٰ تعلیم کے اداروں کے لئے مسلسل مالی تعاون کی عکاسی کرتی ہے۔ویلتھ پاکستان کو دستیاب سرکاری دستاویز کے مطابق ہائیر ایجوکیشن کمیشن بلوچستان کی جامعات کو جاری گرانٹس، اضافی فنڈز اور ٹینیور ٹریک سپورٹ کے مختلف نظاموں کے تحت مسلسل مالی معاونت فراہم کر رہا ہے۔مالی سال26۔2025کے دوران یونیورسٹی آف بلوچستان، کوئٹہ کو 94 کروڑ 88 لاکھ روپے سے زائد کی سالانہ گرانٹ فراہم کی گئی۔
اس کے علاوہ یونیورسٹی کو ایک کروڑ روپے اضافی فنڈنگ اور 3 کروڑ 95 لاکھ روپے سے زائد ٹینیور ٹریک سپورٹ کی مد میں بھی دیئے گئے۔اسی طرح بلوچستان یونیورسٹی آف انفارمیشن ٹیکنالوجی، انجینئرنگ اینڈ مینجمنٹ سائنسز (بیوٹمز)، کوئٹہ کو مالی سال26۔2025کے دوران 69 کروڑ 80 لاکھ روپے فراہم کئے گئے۔ اس ادارے کو مالی سال25۔2024میں 72 کروڑ 20 لاکھ روپے جبکہ مالی سال24۔2023میں 82 کروڑ 50 لاکھ روپے موصول ہوئے تھے۔صوبے کی دیگر جامعات کو بھی ایچ ای سی کی معاونت جاری رہی۔ سردار بہادر خان ویمن یونیورسٹی، کوئٹہ کو مالی سال26۔2025میں 28 کروڑ 20 لاکھ روپے ملے جبکہ مالی سال25۔2024میں یہ رقم 31 کروڑ 30 لاکھ روپے اور مالی سال24۔2023میں 29 کروڑ 30 لاکھ روپے تھی۔
اسی طرح یونیورسٹی آف تربت کو مالی سال 26۔2025کے دوران 17 کروڑ 30 لاکھ روپے فراہم کئے گئےجبکہ اسے مالی سال 2024-25 میں 19 کروڑ 20 لاکھ روپے اور مالی سال 2023-24 میں 20 کروڑ 20 لاکھ روپے موصول ہوئے تھے۔یونیورسٹی آف لورالائی کو مالی سال 2025-26 میں 13 کروڑ 60 لاکھ روپے فراہم کئے گئےجبکہ مالی سال 2024-25 میں 15 کروڑ 20 لاکھ روپے اور مالی سال 2023-24 میں 17 کروڑ 50 لاکھ روپے دیئے گئے تھے۔لسبیلہ یونیورسٹی آف ایگریکلچر، واٹر اینڈ میرین سائنسز، اوتھل کو مالی سال 2025-26 کے دوران 32 کروڑ 70 لاکھ روپے موصول ہوئے۔ اس ادارے کو مالی سال 2024-25 میں 34 کروڑ 20 لاکھ روپے جبکہ مالی سال 2023-24 میں 35 کروڑ 20 لاکھ روپے فراہم کئے گئے تھے۔
اسی طرح بلوچستان یونیورسٹی آف انجینئرنگ اینڈ ٹیکنالوجی، خضدار کو مالی سال 2025-26 کے دوران 29 کروڑ 10 لاکھ روپے فراہم کئے گئے جبکہ مالی سال 2024-25 میں 30 کروڑ 40 لاکھ روپے اور مالی سال 2023-24 میں 33 کروڑ 40 لاکھ روپے دیئے گئے تھے۔دوسری جانب بولان یونیورسٹی آف میڈیکل اینڈ ہیلتھ سائنسز، کوئٹہ کو مالی سال 2023-24، مالی سال 2024-25 اور مالی سال 2025-26 کے دوران سالانہ 2 کروڑ روپے کی مستقل گرانٹ فراہم کی جاتی رہی۔دستاویز کے مطابق صوبے کی جامعات کے لئے سالانہ جاری گرانٹس فنڈنگ کا سب سے بڑا حصہ رہی ہیں۔
یہ گرانٹس مالی سال 2023-24 اور مالی سال 2024-25 میں 2 ارب 98 کروڑ روپے سے تجاوز کر گئیں جبکہ مالی سال 2025-26 میں یہ تقریباً 2 ارب 88 کروڑ روپے رہیں۔مجموعی طور پر بلوچستان کی جامعات کے لئے مالیاتی مختص رقم مالی سال 2023-24 میں 3 ارب 30 کروڑ 23 لاکھ روپے، مالی سال 2024-25 میں 3 ارب 10 کروڑ 94 لاکھ روپے اور مالی سال 2025-26 میں 2 ارب 92 کروڑ 78 لاکھ روپے رہی۔دستاویز کے مطابق یہ فنڈنگ بلوچستان میں اعلیٰ تعلیمی اداروں کی آپریشنل اور تعلیمی ضروریات پوری کرنے کے لئے جاری مالی معاونت اور ادارہ جاتی تعاون کی عکاسی کرتی ہے۔