نیو کیسل: ایک نئی تحقیق میں بتایا گیا ہے کہ انرجی ڈرنکس بچوں میں تشدد اور لت سمیت پریشانی، تناؤ، ڈپریشن جیسے رویے کے بڑھتے ہوئے خطرے سے منسلک ہیں۔
برطانیہ کی نیو کیسل یونیورسٹی کے محققین کے مطابق اس تحقیق میں یہ بھی معلوم ہوا کہ انرجی ڈرنکس کے زیادہ استعمال کا تعلق تعلیمی کارکردگی میں کمی، نیند کے مسائل اور کھانے کی غیر صحت بخش عادات سے ہے۔
اس تحقیق کی شریک مصنف ڈاکٹر شیلینا وسرام نے کہا کہ محققین کو ان نتائج پر گہری تشویش ہے، جو یہ بتاتے ہیں کہ انرجی ڈرنکس نفسیاتی تناؤ اور دماغی صحت کے مسائل کا باعث بن سکتے ہیں۔
یہ صحت عامہ کے اہم مسائل ہیں جن پر توجہ دینے کی ضرورت ہے۔
ڈاکٹر شیلینا نے کہا کہ سافٹ ڈرنکس کی تیزی سے پھیلتی ہوئی مارکیٹ پر کام کرنے کا وقت آ گیا ہے۔
محققین نے برطانوی حکومت پر زور دیا ہے کہ وہ 16 سال سے کم عمر بچوں کو انرجی ڈرنکس کی فروخت پر پابندی عائد کرے کیونکہ یہ پانی سے سستے ہیں۔
تحقیقی جائزے میں، سائنسدانوں نے 57 مطالعات سے صحت کے ڈیٹا کا جائزہ لیا۔ ان مطالعات میں 21 سے زیادہ ممالک کے 1.2 ملین سے زیادہ بچوں اور نوعمروں نے حصہ لیا۔