راولپنڈی: آفیشل سیکرٹ ایکٹ عدالت نے پی ٹی آئی کے بانی شاہ محمود قریشی کو سائفر کیس میں 10 سال قید کی سزا سنادی۔
آفیشل سیکرٹ ایکٹ عدالت کے جج ابوالحسنات محمد ذوالقرنین نے اڈیالہ جیل میں کیس کی سماعت کی۔ فاضل جج نے 342- کے بیان کے لیے سوالنامے اور بیانات کی کاپیاں بانی پی ٹی آئی اور شاہ محمود قریشی کو فراہم کیں۔
سوالنامے میں ملزمان سے تقریباً 36 سوالات کے جوابات پوچھے گئے۔ دونوں رہنماؤں نے اپنے اپنے جوابات لکھے۔
342 کا بیان قلمبند کرنے کے بعد فاضل جج نے سزا سنانے سے قبل عمران خان سے آخری سوال کیا، سائفر کہاں گیا؟
بانی پی ٹی آئی نے جواب دیا کہ مجھے نہیں معلوم، سائفر میرے ساتھ نہیں بلکہ میرے دفتر میں تھا، میں اپنے بیان میں لکھ چکا ہوں، وزیراعظم آفس کی سیکیورٹی میری ذمہ داری نہیں تھی۔
شاہ محمود قریشی کا بیان قلمبند کرنے سے قبل ہی عدالت نے پی ٹی آئی کے بانی اور شاہ محمود قریشی دونوں کو قید کی سزا سنادی۔
فیصلے کے بعد بانی پی ٹی آئی مسکراتے رہے جب کہ شاہ محمود قریشی نے احتجاج کرتے ہوئے کہا کہ میرا بیان ابھی تک ریکارڈ نہیں ہوا۔