پشاور: نجی شعبہ کو صنعت سیاحت میں سرمایہ کاری کی دعوت، مشیر سیاحت و ثقافت

وزیراعلی خیبرپختونخوا کے مشیر برائے سیاحت و ثقافت زاہد چن زیب نے سیاحت کے فروغ میں نجی شعبے کو بھرپور انداز میں شرکت کیلئے مدعو کرتے ہوئے کہا ہے کہ یہ نہ صرف منافع بخش کاروبار بلکہ تخلیقی اور صحت مند صنعت ہے جس میں قومی اور بین الاقوامی سطح پر سیاحوں کی دلچسپی مسلسل بڑھتی جا رہی ہے۔ انہوں نے یقین دلایا کہ صوبائی حکومت اس ضمن میں دیگر شعبوں کی طرح ٹرانسپورٹرز کی بھی ہر طرح حوصلہ افزائی کرے گی اور انکی سرمایہ کاری کو ہرممکن تحفظ فراہم کیا جائے گا۔ اس امر کا اعلان انہوں نے ممتاز ٹرانسپورٹر اور نیازی ایکسپریس کے چیف ایگزیکٹیو فاروق اعظم نیازی سے بات چیت کے دوران کیا جنہوں نے اچھی ساکھ کے حامل بعض ٹرانسپورٹرز کی معیت میں ان سے انکے دفتر سول سیکرٹریٹ پشاور میں ملاقات کی اور خیبر پختونخوا میں سیاحت کے فروغ کیلئے اپنی خدمات پیش کیں۔ اس موقع پر مشیر سیاحت نے نجی شعبے کے زیر اہتمام صوبے کے مختلف صحت افزاء مقامات کیلئے معیاری اور سستے گروپ سیاحتی ٹورز کیلئے ٹرانسپورٹرز کو لائسنس بھی دیئے۔ ڈائریکٹر جنرل کلچر اینڈ ٹورازم اتھارٹی برکت اللہ مروت بھی اس موقع پر موجود تھے۔ زاہد چن زیب نے کہا کہ حکومت اپنے محدود مالی وسائل کے پیش نظر اکیلے سرکاری سطح پر کسی بھی شعبے کو ترقی نہیں دے سکتی جب تک نجی شعبہ اس میں بھرپور انداز میں حصہ دار نہ بنے۔ انہوں نے ٹرانسپورٹرز پر زور دیا کہ وہ ضروری لوازمات اور ضابطے کی کارروائی مکمل کرکے خیبرپختونخوا، گلکت بلتستان اور سرحدی علاقوں تک سیاحتی گروپس کے پروگرام بنائیں اور انکی ذرائع ابلاغ سے خوب تشہیر بھی کریں تاکہ نہ صرف زیادہ سے زیادہ سیاح ان صحت افزاء مقامات کی سیر سے لطف اندوز ہوں بلکہ عالمی سطح پر یہاں کے قدرتی و سیاحتی مقامات اور عوام کا سافٹ امیج بھی نظر آنے لگے۔ مشیر سیاحت نے امید ظاہر کی کہ ٹرانسپورٹرز سیاحت کی ترقی میں سرمایہ کاری کیلئے صوبائی حکومت کی جانب سے مہیا کردہ مواقع اور سہولیات سے کماحقہ استفادہ کریں گے اور سیاحت کے شعبے میں بھی اپنی اچھی ساکھ قائم کرکے اس صنعت کی ترقی میں اپنا کلیدی کردار ادا کریں گے۔