سوات(بیورورپورٹ)سوات میں 28 اکتوبر تا 1 نومبر 2024 تک پولیو سے بچاؤ اور وٹامن اے کے قطرے پلانے کی قومی مہم شروع کی جائیگی اس سلسلے میں ضلعی انسداد پولیو کمیٹی کا ویڈیو لنک اجلاس ڈپٹی کمشنر سوات شہزاد محبوب کی زیرِ صدارت منعقد ہوا جس میں پانچ روزہ پولیو اور وٹامن اے کے قطرے پلانے کی مہم کے انتظامات کا جائزہ لیا گیا۔ اجلاس میں ایڈیشنل ایس پی غلام صادق، تمام اسسٹنٹ کمشنرز نے بذریعہ ویڈیو لنک، ڈی ایچ اوسوات ڈاکٹر محمد سلیم خان، این سٹاپ آفیسر ڈاکٹر انور جمال، ڈی ایس او ڈبلیو ایچ او ڈاکٹر قیوم شاہ، تعلیم، صحت اوردیگر متعلقہ محکموں کے افسران اور نمائندوں نے شرکت کی۔اجلاس کو این سٹاپ آفیسر ڈاکٹر انورجمال نے پولیو مہم کے حوالے سے بریفنگ دیتے ہوئے کہا کہ ضلع بھر میں مہم کے دوران 325831 گھرانوں میں موجود 482066 بچوں کو گھر گھر جاکر پولیو ویکسین اور وٹامن اے کے قطرے پلائے جائینگے جس کیلئے 468 ایریا انچارج اور 100 یونین کونسل میڈیکل آفیسرزکے زیرِ نگرانی 2115 ٹیمیں تشکیل دی جاچکی ہیں جوبچوں کو گھر گھر جاکرپولیو سے بچاؤ کے قطرے پلائیں گے اس کے علاوہ ضلعی انتظامیہ اور محکمہ صحت کے 22افسران بطور ڈی پی ایم ٹی ضلعی سطح پر جبکہ 7 ٹی ٹی ایم تحصیل کے سطح پر اس مہم کی نگرانی کرینگے۔ اجلاس سے خطاب کرتے ہوئے ڈپٹی کمشنر سوات شہزاد محبوب نے عوام سے اپیل کی کہ اپنے تمام پانچ سال سے کم عمر کے بچوں کو پولیو ویکسین اور وٹامن اے کے قطرے ضرور پلوائیں۔ انہوں نے کہا کہ عوام پولیو اہلکاروں کے ساتھ بھرپور تعاون کریں اور ایک محب وطن شہری کی حیثیت سے پولیو جیسے مہلک مرض سے نجات کے لئے حکومت کاساتھ دیں۔
۔۔۔۔۔۔۔۔۔۔۔۔۔۔۔۔۔۔۔۔۔۔