بیجنگ: چین نے کہا ہے کہ پاکستان میں عام انتخابات مستحکم اور ہموار طریقے سے ہوئے جس کے لیے وہ مبارکباد پیش کرتا ہے۔
بین الاقوامی خبر رساں ادارے کے مطابق چین کی وزارت خارجہ کے ترجمان نے کہا ہے کہ وہ پاکستان میں قومی اور صوبائی اسمبلیوں کے انتخابات کے نتیجے میں بننے والی حکومت کے ساتھ مل کر کام کرنے کے لیے تیار ہیں۔
چینی ترجمان ماؤ ننگ نے ایک پریس بریفنگ میں حکومت سازی میں تاخیر سے متعلق ایک سوال کے جواب میں کہا کہ ہم نے دیکھا کہ پاکستان میں انتخابات عام طور پر مستحکم اور ہموار تھے۔
ان کا مزید کہنا تھا کہ آپ نے جس صورتحال کا ذکر کیا ہے اس میں ہم سمجھتے ہیں کہ پاکستان میں متعلقہ فریق متحد رہ سکتے ہیں اور متعلقہ مسائل کے حل کے لیے مل کر کام کر سکتے ہیں۔
چینی ترجمان نے کہا کہ ایک قریبی اور دوست ہمسایہ ہونے کے ناطے چین پاکستانی عوام کے انتخاب کا مکمل احترام کرتا ہے اور پوری امید کرتا ہے کہ پاکستان کی متعلقہ جماعتیں انتخابات کے بعد سیاسی اتحاد اور سماجی استحکام کو برقرار رکھنے کے لیے مل کر کام کریں گی۔