تل ابیب: اسرائیل نے مبینہ طور پر غزہ میں ایک یونیورسٹی کو نشانہ بنایا اور ایک کیمپس بمباری سے مکمل طور پر تباہ ہوگیا۔
بین الاقوامی خبر رساں ادارے کے مطابق سوشل میڈیا پر وائرل ہونے والی ویڈیو میں بمباری سے تباہ ہونے والی یونیورسٹی کی عمارت کو دیکھا جا سکتا ہے جس کی دیواریں گر چکی ہیں اور چھتوں پر بڑے بڑے سوراخ ہو گئے ہیں۔
ویڈیو میں یونیورسٹی کی عمارت کو خالی دیکھا جا سکتا ہے اور ایسا لگتا ہے کہ کیمپس میں تدریس اور سیکھنے کا عمل جنگ کے آغاز سے ہی معطل ہے۔ کسی جانی نقصان کی اطلاع نہیں ہے۔
ادھر اسرائیلی فوج کی گیواتی بریگیڈ نے حملوں میں ٹینک فائر اور فضائی مدد کا استعمال کرتے ہوئے حماس کے درجنوں جنگجوؤں کو ہلاک کرنے کا دعویٰ کیا ہے۔
دوسری جانب فلسطینی ہلال احمر نے تصدیق کی ہے کہ العمل اسپتال کے قریب توپ خانے اور میزائل داغے گئے۔ غزہ کی وزارت صحت نے ان حملوں میں 77 فلسطینیوں کی شہادت کی تصدیق کی ہے۔