کانفرنس میں پاکستان سمیت چین، انڈیا، آرمینیا، ایران، ترکی اور آذربائیجان کے ممالک شامل ہیں
ایشیا ء اور یورپ سے وسطی ایشیا کیلئے فاسٹ ٹریک، تجارتی راہداریوں سے بندرگاہوں تک رسائی شامل
اسلام آباد: وفاقی وزیر مواصلات، نجکاری اور سرمایہ کاری بورڈ عبدالعلیم خان تاجکستان کا دورہ کریں گے جہاں وہ "روڈ ٹو ٹین شین”کے تحت دو روزہ انٹرنیشنل ریجنل کانفرنس میں پاکستان کی نمائندگی کریں گے۔ 29اور30مئی کو ہونے والی اس عالمی کانفرنس میں پاکستان کے علاوہ چین، انڈیا، آرمینیا،ایران، ترکی اور آذربائیجان کے ممالک شامل ہیں جبکہ عالمی مالیاتی اور سرمایہ کاری کے اہم اداروں کے سربراہان بھی اس اہم کانفرنس میں شرکت کریں گے۔ وفاقی وزیر عبدالعلیم خان تاجکستان کے وزیر ٹرانسپورٹ عاظم ابراہیم کی دعوت پر اس کانفرنس میں شریک ہو رہے ہیں جس کا انعقاد وسط ایشیا ئی ممالک کے مابین 24ستمبر 2023کو ہونے والے معاہدے کے تحت ہو رہا ہے جبکہ اس انٹرنیشنل ریجنل کانفرنس میں ایشیا اور یورپ سے وسطی ایشیا کی ریاستوں کو "فاسٹ ٹریک”سے منسلک کرنے کا نظام وضع کیا جائے گا اورمختلف ممالک کے درمیان شاہرات کی تعمیراور تجارتی رہداریوں سے بندرگاہوں تک کی رسائی کیلئے گرینڈ چارٹر تشکیل دیا جائے گا جس میں پاکستان کو کلیدی اہمیت حاصل ہو گی۔
اس حوالے سے گفتگو کرتے ہوئے وفاقی وزیر مواصلات،نجکاری اور سرمایہ کاری بورڈ عبدالعلیم خان نے کہا کہ پاکستان پہلے ہی افغانستان اور چین کے راستے سے تاجکستان تک کے روڈ نیٹ ورک پر کام کر رہا ہے اور آئندہ بھی ہم وسطی ایشیائی ممالک کے لئے روڈ نیٹ ورک کے اشتراک میں مکمل تعاون کریں گے انہوں نے کہا کہ نئی شاہراہوں کی تعمیر سے ہی تجارتی منڈیوں کے لئے راہداری اور بندرگاہوں تک رسائی ممکن ہو سکے گی اور ایسے عالمی منصوبے پاکستان سے تجارت کے فروغ کے علاوہ بین الملکی تعاون کا باعث ہوں گے جس سے پاکستان میں سرمایہ کاری کے بھی نئے مواقع سامنے آئیں گے۔ عبدالعلیم خان کا مزید کہنا تھا کہ پاکستان کو موجودہ حالات میں معیشت کے استحکام کے چیلنج کا سامنا ہے جس سے احسن انداز میں عہدہ برآ ہونے کیلئے دیگر ممالک سے سڑکوں کے ذریعے منسلک ہونا سنگ میل ثابت ہو سکتا ہے۔