واشنگٹن: امریکی وزیر خارجہ انتھونی بلینکن نے فلسطینی اتھارٹی کے صدر محمود عباس سے ملاقات میں فلسطینی ریاست کے قیام کے لیے اپنی مکمل حمایت کا یقین دلایا۔
عالمی خبر رساں ادارے کے مطابق امریکی وزیر خارجہ انتھونی بلینکن مشرق وسطیٰ کے اہم دورے پر قطر، سعودی عرب اور اسرائیل کے بعد فلسطین پہنچ گئے جہاں انہوں نے فلسطینی اتھارٹی کے صدر محمود عباس سے ملاقات کی۔
ملاقات میں دونوں رہنمائوں نے مسئلہ فلسطین کے پائیدار اور مستقل حل کی ضرورت پر تبادلہ خیال کیا اور اس سلسلے میں ممکنہ اقدامات پر بھی غور کیا جن پر دونوں فریقین متفق ہیں۔
صدر محمود عباس سے بات چیت میں امریکی وزیر خارجہ انتھونی بلینکن نے آزاد اور خود مختار فلسطینی ریاست کے قیام کے لیے حمایت کا یقین دلایا اور کہا کہ وہ اس سے متعلق تمام معاملات پر آپ کے ساتھ کھڑے ہیں۔
جس پر فلسطینی صدر محمود عباس نے ان کا شکریہ ادا کرتے ہوئے کہا کہ ہمارا ہمیشہ سے یہ موقف رہا ہے کہ تنازعہ فلسطین کو دو ریاستی حل کے ذریعے ختم کیا جا سکتا ہے۔
تاہم صدر محمود عباس نے خدشہ ظاہر کیا کہ اسرائیل ٹیکس فنڈز فلسطینی اتھارٹی کو منتقل کرنے سے انکار کر دے گا، حالانکہ یہ اوسلو معاہدے کا حصہ ہے۔
امریکی وزیر خارجہ سے ملاقات میں صدر محمود عباس نے زور دیا کہ فلسطینیوں کے انخلاء کے فنڈز فوری طور پر جاری کیے جانے کی ضرورت ہے۔
آپ کو بتاتے چلیں کہ 7 اکتوبر سے جاری اسرائیل حماس جنگ کے دوران امریکی وزیر خارجہ کا یہ چوتھا دورہ ہے، جس میں انہوں نے مسئلہ فلسطین کے حل کے لیے تمام فریقین سے الگ الگ ملاقاتیں کی ہیں۔