لندن: معروف میگزین دی گارڈین نے اپنی ایک رپورٹ میں انکشاف کیا ہے کہ مودی رام مندر کی افتتاحی تقریب کی آڑ میں اپنی انتخابی مہم شروع کرنا چاہتے ہیں۔
دی گارڈین میں شائع ہونے والی ایک تجزیاتی رپورٹ کے مطابق وزیر اعظم نریندر مودی اس سال کے عام انتخابات جیتنے کے لیے ہندوستان کے 80 فیصد ہندو عوام کے مذہبی جذبات کو استعمال کر رہے ہیں۔
دی گارڈین نے رپورٹ کیا ہے کہ بابری مسجد کی جگہ پر رام مندر کی تعمیر دراصل مودی کی 2014 میں اقتدار میں آنے کے بعد ہندوستان کو ہندو قوم بنانے کی مہم کا ثبوت ہے۔
رپورٹ میں کہا گیا ہے کہ بھارت کی دیگر سیاسی جماعتوں نے مودی کی سیاسی چال کو اجاگر کرتے ہوئے مندر کی افتتاحی تقریب میں شرکت سے انکار کر دیا۔
اسی طرح ہندوستان کے بڑے مندروں کے پنڈتوں اور مذہبی رہنماؤں نے بھی مودی کے ذریعہ رام مندر کے افتتاح میں شرکت سے انکار کرتے ہوئے اسے نامناسب قرار دیا۔
دی گارڈین کے مطابق ہندو مذہبی رہنماؤں کا خیال ہے کہ رام مندر کا افتتاح کسی مذہبی رہنما کو کرنا چاہیے تھا۔ سیاست دانوں کو اس خالص مذہبی تقریب سے کوئی سروکار نہیں ہونا چاہیے۔
یاد رہے کہ رواں ماہ وزیراعظم نریندر مودی بابری مسجد کی جگہ پر بنائے گئے رام مندر کا افتتاح کریں گے اور انہوں نے اس پروگرام کو اپنی انتخابی مہم کا حصہ بھی بنایا ہے۔