اسلام آباد: اوگرا نے سوئی ناردرن کے ٹیرف میں 35.1 فیصد اور سوئی سدرن کے لیے 8.5 فیصد اضافہ کر دیا ہے جس کا اطلاق 2 فروری سے ہو گا۔
اوگرا نے اضافے کا نوٹیفکیشن منظوری کے لیے وفاقی حکومت کو بھجوا دیا۔
نوٹیفکیشن کے مطابق سوئی ناردرن سسٹم پر گیس کی اوسط قیمت 1238.68 روپے سے بڑھا کر 1673.82 روپے فی ایم ایم بی ٹی یو کر دی گئی ہے۔
سوئی ناردرن کو صارفین سے 180 ارب روپے مزید وصول کرنے کی اجازت دی گئی۔
سوئی سدرن کی گیس کی اوسط قیمت 1350.68 روپے سے بڑھا کر 1466.40 روپے فی ایم ایم بی ٹی یو کر دی گئی ہے۔
سوئی سدرن کو صارفین سے 48 ارب روپے مزید وصول کرنے کی اجازت دی گئی۔
نوٹیفکیشن کے مطابق اوگرا سوئی کمپنیوں سے گیس چوری کی شرح کم کرنے میں ناکام رہا ہے۔
اوگرا کے مطابق سوئی کمپنیوں نے اوگرا کو گیس چوری میں کمی کے لیے کوئی ٹھوس پلان پیش نہیں کیا اور رواں مالی سال میں سوئی ناردرن کو گیس چوری کی وجہ سے 14 ارب 77 کروڑ روپے کا نقصان ہوگا۔
اوگرا نے کمپنی کے منافع پر 10 فیصد سپر ٹیکس کا بوجھ صارفین پر ڈالنے کی منظوری دے دی۔
حکومت نے یکم جولائی سے زیادہ منافع کمانے والی کمپنیوں پر سپر ٹیکس لگانا شروع کر دیا تھا اور ہدایت کی تھی کہ اس لیوی کا بوجھ صارفین پر نہ ڈالا جائے۔
سوئی ناردرن کو کرک میں دفتر کھولنے کی بھی اجازت دی گئی جس کے لیے سالانہ 10 کروڑ روپے کے اخراجات کی منظوری دی گئی۔