کراچی: پاکستان سپر لیگ سیزن نائن کے 15ویں میچ میں اسلام آباد یونائیٹڈ نے کراچی کنگز کو 7 وکٹوں سے شکست دے دی۔
نیشنل بینک کرکٹ اسٹیڈیم کراچی میں کھیلے گئے میچ میں اسلام آباد یونائیٹڈ نے 165 رنز کا ہدف 18.3 اوورز میں 3 وکٹوں کے نقصان پر حاصل کرلیا۔
ہدف کے تعاقب میں اسلام آباد یونائیٹڈ کے اوپنرز نے ٹیم کو 108 رنز کا شاندار آغاز فراہم کیا۔ کولن منرو نے 82 اور ایلکس ہیلز نے 47 رنز بنائے۔
عماد وسیم صفر پر پویلین لوٹ گئے، آغا سلمان نے 25 اور کپتان شاداب خان نے 10 رنز بنا کر میچ کا اختتام کیا۔
کراچی کنگز کی جانب سے محمد نواز، حسن علی اور تبریز شمسی نے ایک ایک وکٹ حاصل کی۔
اس سے قبل اسلام آباد یونائیٹڈ کے کپتان شاداب خان نے ٹاس جیت کر پہلے بولنگ کا فیصلہ کیا تھا۔ کراچی کنگز نے پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 165 رنز بنائے۔ کیرون پولارڈ 48 اور عرفان خان 27 رنز بنا کر ناٹ آؤٹ رہے۔
کپتان شان مسعود نے 27، ٹیم سیفرٹ نے 8، لوئس ڈوپلوئے نے 24، شعیب ملک اور محمد نواز نے بالترتیب 6 اور 6 رنز بنائے۔
اسلام آباد یونائیٹڈ کی جانب سے عماد وسیم، نسیم شاہ، آغا سلمان اور حنین شاہ نے ایک ایک وکٹ حاصل کی۔
اس ٹورنامنٹ میں کراچی کنگز نے 4 جبکہ اسلام آباد یونائیٹڈ نے 5 میچز کھیلے ہیں۔ کراچی کنگز نے دو میچ ہارے اور دو جیتے۔ اسلام آباد یونائیٹڈ نے تین میچ ہارے ہیں اور دو جیتے ہیں۔
پوائنٹس ٹیبل میں اسلام آباد یونائیٹڈ بہتر رن ریٹ کی بنیاد پر چوتھے نمبر پر آ گئی ہے جبکہ کراچی کنگز چوتھے سے پانچویں نمبر پر آ گئی ہے۔ دونوں ٹیموں کے چار چار پوائنٹس ہیں۔
کراچی کنگز: شان مسعود (کپتان)، ٹم سیفرٹ (وکٹ کیپر)، لوئس ڈو پلوئے، شعیب ملک، کیرون پولارڈ، محمد نواز، محمد عرفان خان، حسن علی، میر حمزہ، تبریزی شمسی، محمد عامر خان۔
اسلام آباد یونائیٹڈ: ایلکس ہیلز، کولن منرو، سلمان علی آغا، شاداب خان (کپتان)، اعظم خان (وکٹ)، جورڈن کاکس، عماد وسیم، فہیم اشرف، نسیم شاہ، حنین شاہ، رومان رئیس۔