سوات(بیورورپورٹ) سوات میں 28 اکتوبر تا 1 نومبر 2024 تک پولیو سے بچاؤ اور وٹامن اے کے قطرے پلانے کی قومی مہم شروع کی جائیگی ااور اس دوران 482066 بچوں کوپولیو سے بچاؤکے قطرے پلائے جائیں گے ۔ اس سلسلے میں ضلعی انسداد پولیو کمیٹی کا اجلاس ڈپٹی کمشنر سوات شہزاد محبوب کی زیرِ صدارت منعقد ہوا جس میں پانچ روزہ پولیو اور وٹامن اے کے قطرے پلانے کی مہم کے انتظامات کا جائزہ لیا گیا۔ اجلاس میں قائم مقام ڈسٹرکٹ پولیس آفیسر باچاحضرت، تمام اسسٹنٹ کمشنرز نے بذریعہ ویڈیو لنک، ڈی ایچ اوسوات ڈاکٹر محمد سلیم خان، ای پی آئی کوارڈینیٹر ڈاکٹر لیاقت علی اوردیگر متعلقہ محکموں کے افسران اور نمائندوں نے شرکت کی۔اجلاس کو بتایا گیاکہ ضلع بھر میں مہم کے دوران 325831 گھرانوں میں موجود 482066 بچوں کو گھر گھر جاکر پولیو ویکسین اور وٹامن اے کے قطرے پلائے جائینگے جس کیلئے 468 ایریا انچارج اور 100 یونین کونسل میڈیکل آفیسرزکے زیرِ نگرانی 2115 ٹیمیں تشکیل دی جاچکی ہیں جوبچوں کو گھر گھر جاکرپولیو سے بچاؤ کے قطرے پلائیں گے اس کے علاوہ ضلعی انتظامیہ اور محکمہ صحت کے 22افسران بطور ڈی پی ایم ٹی ضلعی سطح پر جبکہ 7 ٹی ٹی ایم تحصیل کے سطح پر اس مہم کی نگرانی کرینگے۔ اجلاس سے خطاب کرتے ہوئے ڈپٹی کمشنر سوات شہزاد محبوب نے عوام سے اپیل کی کہ اپنے تمام پانچ سال سے کم عمر کے بچوں کو پولیو ویکسین اور وٹامن اے کے قطرے ضرور پلوائیں۔
۔۔۔۔۔۔۔۔۔۔۔۔۔