باجوڑ میں یوم سیاہ کشمیر کے موقع پر ریلی اور تقریب کا انعقاد کیاگیا۔ صوبائی حکومت کے احکامات کی روشنی میں ملک کے دیگر اضلاع کی طرح ضلع باجوڑ میں بھی کشمیری بھائیوں سے اظہارِ یکجہتی کے طور پر یومِ سیاہ منایا گیا۔ ڈپٹی کمشنر باجوڑ شاہد علی خان کی زیر نگرانی یومِ سیاہ کی مرکزی تقریب سول کالونی جرگہ ہال، خار میں منعقد ہوئی۔ تقریب میں ایڈیشنل ڈپٹی کمشنر جنرل علی رضا، اسسٹنٹ کمشنر خار ڈاکٹر صادق علی، تحصیل چیئرمینز سب ڈویژن خار/ناواگئ، تمام محکمہ جات کے سربراہان، ضلعی عمائدین،علماء دین، نوجوانان اور مختلف سکولوں کے طلباء نے بھرپور شرکت کی۔ تقریب سے خطاب کرتے ہوئے ڈپٹی کمشنر، شاہد علی خان اور ضلعی عمائدین نے کشمیر میں بھارتی جبر کی شدید مذمت کی اور کشمیری بھائیوں کے ساتھ اخلاقی اور معاشرتی تعاون کے عزم کا اعادہ کیا۔ تقریب کےاختتام پرپاکستان و کشمیر کے پرچموں اور سیاہ جھنڈوں کیساتھ تقریب میں شامل لوگوں نےسول کالونی جرگہ ہال سے کالونی مین چوک تک ریلی نکالی، جس میں ہندوستان کے جبری قبضےکے خلاف بھرپور نعرہ بازی کی گئی۔ یومِ سیاہ منانے کا مقصد دنیا کو یہ پیغام دینا ہے کہ کشمیر پاکستان کی شہ رگ ہے اور اس کی حفاظت ہماری اولین ذمہ داری ہے۔ پاکستانی عوام ہندوستان کے 27 اکتوبر کے غیر قانونی اقدام کی شدید مذمت کرتے ہیں اور عالمی برادری سے مطالبہ کرتے ہیں کہ کشمیری عوام پر ڈھائے جانے والے مظالم اور انسانی حقوق کی خلاف ورزیاں بند کی جائیں اور مسئلہ کشمیر کو اقوام متحدہ کی قراردادوں اور کشمیری عوام کی امنگوں کے مطابق حل کیا جائے۔ریلی کے اختتام پر ملک کی سلامتی،خوشحالی، امن اور کشمیر کے لوگوں کےجلد حصول آزادی کے لیے دعا کی گئی۔