پشاور، 16 فروری 2026ء: نارتھ ویسٹ سکول آف میڈیسن نے اپنا چوتھا کانوکیشن منعقد کیا، جس میں ایم بی بی ایس سیشن 2019–2024 کے 107 طلبہ و طالبات کو ڈگریاں تفویض کی گئیں۔ تقریب کالج آڈیٹوریم میں منعقد ہوئی جس میں معزز مہمانانِ گرامی، اساتذہ کرام، والدین اور فارغ التحصیل طلبہ و طالبات نے شرکت کی۔
تقریب کے مہمانِ خصوصی پروفیسر ڈاکٹر سردار محمد عالم، چیئرمین (اے ایچ ایل) تھے۔ دیگر معزز شرکاء میں مسٹر انعام اللہ وزیر، رجسٹرار (کے ایم یو)،پروفیسر ڈاکٹر روبینہ نازلی، ڈین کے ایم یو، پروفیسر ڈاکٹر امیر خان ، پرنسپل این ڈبلیو ایس ایم، پروفیسر ڈاکٹر عابد حسین، وائس پرنسپل (اکیڈمکس) این ڈبلیو ایس ایم؛ اور ڈاکٹر سدرہ جبار، ڈین اے ایچ ایل شامل تھے۔
تقریب کے دوران پانچ نمایاں گریجویٹس کو غیر معمولی تعلیمی کارکردگی پر پوزیشن ہولڈرز کے طور پر اعزازات سے نوازا گیا۔ ڈاکٹر محمد عاصم نے سب سے نمایاں کارکردگی کا مظاہرہ کرتے ہوئے مجموعی طور پر سات گولڈ میڈلز حاصل کیے ۔ تین کے ایم یو پروفیشنل امتحانات میں جبکہ تین این ڈبلیو ایس ایم میں اور ایک بیسٹ گریجویٹ کا اعزاز اپنے نام کیا۔ ڈاکٹر صفی اللہ نے چھ گولڈ میڈلز حاصل کیے جن میں تین کے ایم یو پروفیشنل امتحانات اور تین این ڈبلیو ایس ایم کے شامل تھے۔ ڈاکٹر معوذ علی نے این ڈبلیو ایس ایم میں تین گولڈ میڈلز اپنے نام کیے۔ ڈاکٹر طیب خان کو کے ایم یو پروفیشنل امتحان میں ایک گولڈ میڈل دیا گیا جبکہ ڈاکٹر شفیق نے بھی کے ایم یو پروفیشنل امتحان میں ایک گولڈ میڈل حاصل کیا۔ ان کامیابیوں سے ان کی محنت، لگن اور تعلیمی میدان میں اعلیٰ کارکردگی کا ثبوت ملتا ہے۔
اپنے استقبالیہ خطاب میں پروفیسر ڈاکٹر امیر خان نے گریجویٹس کو مبارکباد پیش کی اور ادارے کی تعلیمی ترقی اور شعبۂ صحت میں ان کے اہم کردار پر روشنی ڈالی جبکہ پروفیسر ڈاکٹر عابد حسین، وائس پرنسپل (اکیڈمکس) نے فارغ التحصیل ڈاکٹروں سے پیشہ ورانہ حلف لیا۔
ڈاکٹر سدرہ جبار نے ادارے کے اعلیٰ تعلیمی معیار کو برقرار رکھنے کے عزم اور ماہر و باصلاحیت طبی ماہرین کی تیاری کے مشن پر زور دیا۔
مہمانِ خصوصی پروفیسر ڈاکٹر سردار محمد عالم نے اپنے خطاب میں فارغ التحصیل طلبہ کو نصیحت کی کہ وہ اپنے پیشے سے مخلص رہیں، اساتذہ اور والدین کا احترام کریں اور شعبۂ طب کے وقار اور اخلاقیات کو برقرار رکھیں۔
تقریب کا اختتام فخر اور مسرت کے جذبات کے ساتھ ہوا، جب نئے ڈاکٹر انسانیت کی خدمت کے جذبے، علم، دیانت اور ہمدردی کے ساتھ اپنے پیشہ ورانہ سفر کا آغاز کرنے کے لیے تیار ہوئے۔