نئی دہلی: تاریخ میں پہلی بار سعودی عرب سے 11 سکاؤٹ کیڈٹس ہندوستان کے یوم جمہوریہ کیمپ میں شرکت کے لیے آج نئی دہلی پہنچے۔
عالمی خبر رساں ادارے کے مطابق بھارت کا یوم جمہوریہ 26 جنوری کو منایا جا رہا ہے، کیمپ میں شرکت کے لیے دنیا بھر کے 20 سے زائد ممالک کے اسکاؤٹس آج نئی دہلی پہنچ رہے ہیں۔
تاریخ میں یہ پہلا موقع ہے کہ سعودی سکاؤٹس نے کسی تقریب میں شرکت کے لیے ہندوستان کا دورہ کیا ہے۔
سعودی عرب سکاؤٹس ایسوسی ایشن کی گیارہ لڑکیاں اور لڑکے ہندوستان میں یوم جمہوریہ کی سرکاری تقریبات اور سالانہ کیڈٹ کیمپ میں حصہ لیں گے۔
سعودی سکاؤٹس اپنے دو ہفتے کے دورہ بھارت کے دوران ہندوستانی ثقافت اور تاریخ کو دیکھنے کے لیے تاریخی شہروں کا دورہ کریں گے اور 27 جنوری کو وزیر اعظم مودی کی ریلی اور مارچ میں بھی شرکت کریں گے۔
سعودی عرب اسکاؤٹس ایسوسی ایشن کے ترجمان نے عرب نیوز کو بتایا کہ دورہ بھارت کے دوران ہم ایک ثقافتی شو بھی پیش کریں گے جس میں سعودی رسم و رواج، آرٹ اور کھانے پینے کی چیزیں پیش کی جائیں گی۔